عشت مع زوجى 29 سنة كلها مرار بسبب سوء أخلاقه وعصبيته وعدوانيته . أبوه وأمه قاطعوه وماتوا غضبانين عليه ، وأخوه الوحيد نفس الشىء. أولادنا انفصلوا عنا لما تخرجوا وكل واحد منهم شق طريقه بعيد عنا . أنا الوحيدة اللى استحملته . انا موظفة مجتهدة ووصلت الى منصب مدير عام ، وكان شغلى بيريحنى واسعد أوقاتى فى المكتب ، وأتعس أوقاتى لما أروح البيت بسبب الاذلال اللى بأشوفه منه . وليالى كتيرة كنت أنام بدموعى ، وعمره ما سأل فىّ ولا إهتم بىّ . بقيت أدوّر على أى ميزة فيه مفيش . ونصحونى أهلى وأولادى بالطلاق ورفضت من أجل سُمعة أولادى ، وعشان لما يتجوزوا يكون أبوهم وامهم فى فرحهم . وكنت أسأل نفسى لو مات إزاى حأحزن عليه . ومرة واحدة سقط مريض . واصبح محتاج لى لما يقوم ولما ينام ولما ياكل ، وعايز رعاية طول اليوم. خدت أجازة وتفرغت له ، وبقى إنسان تانى خالص . يمسك ايدى ويبوسها ويبكى ، ويلعن فى نفسه إزاى كان بيظلمنى وبيذلّنى ، ويرجونى أسامحه . وسامحته بس بقى السؤال : إزاى كان عارف بكل اللى بيعمله ظلم وغلط ومصمم عليه . وفى الآخر بيندم . مات .. ولقيت نفسى حزينة عليه ، ومفيش حاجة حلوة أفتكرها منه إلا الشهرين اللى مرض فيهم . هل ممكن يكون الظالم عارف انه ظالم ويستمر فيه ؟ وفين الضمير ؟ أم إن الضمير بيصحى عند المرض وقبل الموت ؟