المشهد .. ليل داخلى .. وانا جالس الى مكتبى فى عيادتى الخاصة فى وسط مدينة القاهرة فى انتظار دخول السكرتيرة لتقديم المريض القادم . تدخل السكرتيرة وفى يدها ملف مريض جديد يحضر الى العيادة للمرة الأولى ولكنني لاحظت أن السيدة جميلة وهذا هو اسم السكرتيرة تركت خانة الاسم فى البيانات الشخصية للمريض فارغة .

انا : هو المريض مالوش اسم ؟
السكرتيرة : طبعا له بس ما عرفتش أكتبه فسيبته لحضرتك
انا: خليه يتفضل
دلف الى الحجرة شاب فى السادسة والعشرين ذو ملامح مصرية يرتدى ملابس كاجوال واضح منها أنه من أسرة ميسورة الحال وجلس فى الكرسى المقابل بعد أن صافحته ..
انا: مدام جميلة بتقول ماعرفتش تكتب الاسم الأول .. هو انت اسمك ايه
المريض: المقداد
_ افندم
- المقدااااد
- وده ليه يا ابنى
- (باسما) أبويا سماني كده على اسم الصحابى الجليل المقداد بن عمرو
- وأصدقاءك بينادوك ازاى
- عادى .. اللى يقول يا موق واللى يقول يا داد وساعات يا ميكو
- واشقاءك اساميهم كده برضه؟
- لا أسماؤهم عادية .. أخويا الأصغر مني لما اتولد ابويا كان عاوز يسميه القعقاع بس أعمامى وقفوا له.
واكملت المقابلة الطبية وودعته وحملته السلام لوالده