خالى موظف فقير ، وبنت خالى فى نفس سنى وجميلة جدا . ما كملتش تعليمها وخالى من بدرى جوّزها لواحد كبير فى السّن لكن غنى ومقتدر و عنده مزرعة وبيت زى القصر ، وحالى ما حطش على بنته مليم فى الجهاز لأنه اصلا ما معهوش . ونسيبه تكفل بكل حاجة ، وبقى يصرف على العروسة وعلى خالى وبيته وعياله . وخالى مبسوط من كده . واصبح خالى من يوم ما جوزه بنته بيستغل نسيبه ده ه أبشع استغلال حتى ان هذا الرجل بقى يحتقر خالى ، الى درجة إذا خالى زار بنته لا يقابله ويتحجج بأى حجة عشان ما يقابلوش . وخالى ولا هنا ولا يهتم . وبنته تديه اللى هو عاوزه ، وتعمل له الأكل اللى هو عاوزه . ويطلع من عندها هو ومرته وعياله شايلين ومحملين وبنته تتأجر غربية ترجعهم البلد . وكل شهر تبعت له فلوس . والناس فى البلد ببتريق على خالى ودناوته . وابويا مغتاظ من كده ومقاطع خالى ، وبيشعر بالعار منه . وابويا منعنى أروح بيت خالى . وأنا محتار لأنى فعلا بأحب خالى لأن قعدته حلوة ، وبياكل مخ الناس بكلامه وقفشاته . والدى على العكس فقير بس محترم وحساس لكرامته جدا ، ولا يقبل حسنة من حد ، بل ساعات ألاقيه كريم ويعزم الناس الغلابة . لكن من غير ما حد يعرف . هل أقاطع خالى زى ما ابويا عايز ؟ ابويا خايف أطلع زى خالى وأتأثر بيه ..وامى نفسها مكسوفة من خالى وعمايله ولأنه أكل حقها فى الميراث ، وعمره ما زارنا وعمل واجب لأمى فى الاعياد والمناسبات . أمى بتقول لى ابوك عنده حق .إنسى خالك ده خالص ، وزى ما بيجيش لنا تروحش له . بس أنا باحب خالى وبأحب قعدته . أعمل ايه يا دكتور .