السؤال : هذه رسالة هامة ، انشرها وأجيب عليها . يقول صاحبها واحتفظ بإسمه : ( حابب احكى لك قصتى او معاناتى مع ابن اختى . مات ابوه فى حادث وهو طفل صغير ، وعاش هو وامه معنا فى بيتنا بيت العيلة ، وكانت امه بتعبده عبادة ،وتدلعه على الآخر ، وكنت ألبّى كل طلباته والفلوس الى يطلبها ياخدها ، ومع انى كنت حازم مع اولادى التلاتة كنت متهاون معاه لانه يتيم واخاف ازعله او ازعل امه شقيقتى الوحيدة . بهذا الولد فسد ولم يكمل تعليمه . ثم جاءت لنا فرصة السفر والاقامة فى تكساس فى امريكا وسافرت باولادى وزوجتى وتركت اختى وابنها فى بيت العائلة ، وكنت مداوم ابعت لهم مبلغ شهرى . تحسنت احوالنا والاولاد تخرجوواشتغلوا ونجحوا وبقوا يبعتو فلوس لعمتهم وابن عمتهم وهوتقريبا فى نفس عمر ابنى الكبير . ماتت اختى وبقى ابن اختى وحيد ، وكان كل سنة بيقدم على اللوترى ، وبعد سنوات جاء له اللوترى ، وبعت لنا بالخبر فبعتنا له تذكرة السفر ، وجاء وعاش معنا فى البيت ، وشفنا منه الويل . انا بقيت على المعاش ، واولادى فى شغلهم ويرجعوا هلكانين آخر النهار ، وهو بسلامته يسهر طول الليل يشوف افلام اباحية وياكل ويشرب ورافض يطلع يشتغل او حتى يخدم نفسه . امراتى ست عظيمة استحملته أكتر منى . ومع كده كانت كرامته بتنقح عليه ، أى كلام بينا عادى يعتبره عنه ، وكل مرة يهددنا انه يخرج من البيت واللى يحصل له يحصل ونبقى احنا المسئولين عن اللى يحصل له . وكنا نخاف عليه ونسكت على غلاسته ، لغاية لما فاض بنا الكيل فى يوم . ده كان عيد ميلاد ابنى الكبير ،واتفقنا نعمله فى منتجع غالى وبعيد تلات ساعات عن مدينتنا . حملنا معانا الامتعة للشوى والجلوس فى السيارة وسافرنا وطبعا بسلامته كان معنا . دخلنا بسيارتنا مدخل المنتجع وكان فيه طابور من السيارت متوقفة لدفع الرسوم ، بعد حوالى نص ساعة دخلنا بأمتعتنا ، وطبعا انا وزوجتى واولادى حملنا معظم الأمتعة واضطر هو لان يحمل صندوق الطعام والمشروبات ، وما ان وصلنا للمكان اللى اخترناه فوجئنا به يطلب ان يرجع البيت فورا ،وإلا سيرجع بنفسه واللى يحصل يحصل . إضطر ابنى الكبير انه يرجعه بالسيارة الى بيتنا ثم عاد الينا فى آخر النهار ، وكان يوم نكد . قررنا انه لازم ناخد منه موقف . كانت دى القشة اللى قصمت ظهرالبعير كما يقولون . رجعنا وقعدنا معاه كلنا ، وقلنا له لازم تعيش فى سكن لوحدك وتشتغل وحنلاقى لك شقة ويكون واحد ضامنك ،ونلاقى لك شغل . وتعتمد على نفسك . كالعادة كرر الاسطوانة اياها انه يخرج واللى يحصل يحصل . قلت له الباب قدامك يفوت جمل ، واحنا فى نص الليل اتفضل اطلع دلوقتى من بيتى مش عايزك فى بيتى . مرة واحدة انفجر فى البكاء وبقى يعتذر ، ويرجو ان يبقى معنا وحيتغير ويساعد فى شغل البيت . قلنا لازم تطلع وتسكن وحدك وتشتغل . ظل يبكى ويرجونا وبلا فائدة .عاش معنا اسبوع منكسر . وخلال اسبوع اتاجرنا له شقة متواضعة ولقينا له شغل يغسل اطباق فى مطعم عربى فى وردية ليلية.وحملناه غصب عنه للشقة . وسبنا معاه مبلغ يبتدى بيه . وانتهت علاقتنا بيه الى ان فوجئنا به يأتى لنا بعد ان طرده صاحب المطعم وقال لنا انه قرر يرجع مصر ويعيش فى بيت العيلة ،وعايز ندفع له التذكرة ونبعت له مصروف كل شهر. قلنا له ندفع التذكرة فقط ، ولا فلوس له مطلقا بعد اليوم . رجع واستريحنا منه ، ولكن جات لنا جوابات من البلد ومن اهلنا بتلومنا ، لأنهم لما يسألوه ليه ساب امريكا وكل واحد بيحلم ياخد الفرصة دى يقول لهم ان إحنا السبب ،إحنا اللى طردناه وحاربناه فى رزقه واضطريناه يرجع ايد ورا وايد قدام . وبقت سُمعتنا زى الزفت . وعلى رأى الحديث اللى بيقول : إتّق شر من أحسنت اليه . ارجو ان تنشر رسالتى لاستريح لأن نفسيتى أصبحت فى الحضيض . وشكرا .