أااااه يا بلد

مولد سيدى المرسى لسه منصوب

المكروفونات شغاله صويت

و المرجيح بتطير شمال و يمين .. و الضرب بقى بالطوب

و البنزين على الحطب مصبوب

أااااه يا بلد

باسم الله نازلين فى البلد هدم و تفحيت

هما دول بتوع مشروع النهضة و لا مشروع التفتيت؟

ولا هما دول إللى مشغلين لحسابهم العفاريت؟

أااااه يا بلد

التلفزيون و الصحافه بقى ليها نجوم

بيعملوا بروجرمات دردشه على حسهم

بيعلقوا صورهم فى الشوارع و على الهدوم

و ا صحاب القنوات يلموا من الإعلانات  بالكوم

أااااه يا بلد

كبير ولا صغير قديم ولا جديد غلس ولا لطيف

الواحد من دول يعمل بالليل عملته ... لعيب و حريف

و يقوم الصبح يغسل أيده وعاملى فيها نضيف

أااااه يا بلد

إللى بيقول دستورية و إللى بيقول ثورية

و إللى بيقول أنا بس إللى ليا الأحقية

والناس لايصه بينهم و بقى عندهم لوثه عقلية

أااااه يا بلد

الناس بقت عوطليه ... و فى الميدان قاعدين

شاربين تاتورة ... و من البلوظه واكلين

الواحد منهم فاكر أنه ثورجى و مش دريان أنه بينصر الشياطين

أااااه يا بلد

وائل و أسماء و إسراء و عبد الرحمن و أحمد ماهر ... و كمان مهتاب

و باقى الثورجية يا خسارة ... باعوا عقلهم

و للأخوية باسوا القدم و وقفوا على الأعتاب

فاكرين يا ولداه أنهم هيخدوا حقهم

و هما فى الحقيقة هيخدوا على قفاهم و ذنبهم هيكون على جنبهم

 أااااه يا بلد

اتقوا الله و بطلوا شغل الهجص إللى فى داهية هيوديكم

ده الشعب لما يفوق من غفلته ... هيسويكم

و ورا الشمس و فى مزبلة التاريخ ... كلكم هيرميكم

أااااه يا بلد

مولد سيدى المرسى لسه منصوب

ميفضهوش إلا المجلس العسكرى ... لما يعمل المطلوب

أااااه يا بلد

مصطفى فهمى