• استرجل وانزل يوم 25 يناير ..إلى القوى السياسية : مفيش غير علم مصر والنشيد الوطني هو مش فرح ابن العمدة وكل واحد نازل ينقط

كتب – عمر سعيد :

كالعادة، تقف القوانين المنظمة للصحافة  أمام الكثير مما يجب نشره. الجولة على موقع “فايس بوك” الاجتماعي، كانت مرهقة بقدر ما هي ممتعة . . شباب متحمس وحالة جديدة تستعد ليوم مختلف ربما لا يلبي طموح الجميع لكنه ممكن أن يكون بداية لوضع جديد.. “البديل”، اختارت عدداً من التعليقات التي انتشرت في سياق الدعوة لـ “يوم الغضب” يوم 25 يناير

• مؤيدو الرئيس في 25 يناير يخوضون معركتهم ” على الفيس بوك” بـ 270 مؤيد .. مقابل 69000 يطالبون برحيله في يوم التغيير.
• و ابتدى ابتدى ابتدى ابتدى المشوار …(إلي السعودية طبعا
• عايز أعيش.. عايز أعيش.. عايز أعيش.. ليوم 25.
• إسترجل.. وانزل يوم 25.
• لن يكفينا شرف المحاولة.. إحنا شباب بنواجه دولة.
• الرئيس حايعمل عمرة يوم 25.. والحدق يفهم.
• علماً بأني أعارض قتل النفس إلا أني أعارض أيضا الاستهبال.
• يوم 25.. تفاءل بالخير تجده.

• لو عندك شغلانه واحدة حلوة ومرتبك بيكفي ومش عليك إقساط وعارف تصرف علي ولادك من غير ماتدوس علي ضميرك ومراتك عندها تأمين ورعاية صحية ومش هتتبهدل لو مرضت فجأة وولادك بتدخلهم مدارس بتعلم من غير ماتستلف من بابا وماما ومش محتاج تفكر في السفر .. يبقي أوعي تفكر تنزل مع مظاهرات ٢٥ يناير.. لو مش عندك الحاجات اللي فوق دي خللي عندك دم وانزل طالب بحقوقك البديهية.
• يوم 25 يناير هو العيد القومي لمحافظة الإسماعيلية .. نفسي يبقي العيد القومي لمصر كلها.
• لما خالد سعيد اتقتل اتكسفت اعزي أهله جيراننا..بس يوم 25 حنقول إحنا رجاله وهاعزيهم ..وهاعزي بابا مريم ومارتينا..ونقولهم إحنا آسفين.
• ليه نولع في نفسنا لما ممكن نولع فيهم…يا صابت يا اتنين عور.
• الأمن يزيل صور لجمال مبارك من وسط البلد تحسبا لمظاهرات 25 يناير.
• أنا بره مصر بقالي فتره كبيره ونازل يوم 24 أجازه لمدة 3 أيام بس .. نازل أشارك وارجع ولو نجحنا والله ماهرجع تانى .. هنزل ومش هشوف اهلى .. بس عايز أشوف بلدي حرة .
• تمكنت شابة مصرية بتحب مصر من ترجمة رسايل البحر لفيلم داود عبد السيد والرسايل كتيرة هنترجمها وننزلها تباعا … الرسالة الأولى بتقول: إننا يوم 25 يناير هنحافظ على الممتلكات العامة والخاصة زى عينينا…لان الحاجات دى من فلوسنا ومن شقانا ودمنا.
• أجمل حاجة في ثورة تونس ان ما كانش فيها غير علم تونس والنشيد الوطني، ياريت القوى السياسية ترحمنا وما ترفعش شعاراتها وصورها، مافيش غير علم مصر والنشيد الوطني.. هو مش فرح ابن العمدة وكل واحد نازل ينقط باسمه.