دا أيه الانضباط والالتزام والاهتمام دا كله ..

رضا عبد الرحمن على في الأربعاء 22 ابريل 2015


دا أيه الانضباط والالتزام والاهتمام دا كله ..

مقال بالعامية بهديه لكل مدخن مش ناوي يرحمنا من دخانه ..

من حوالي ربع قرن ــ كان عندي 13 سنة ــ وانا بعيش معاناة مع المدخنيين في كل مكان أقارب واغراب زمايل وأصحاب كبار وصغار أغنياء وفقراء مرضى وأصحاء ، العجيب بقه ان كل المدخنيين دول متفقين وملتزمين ومنضبطين زي ما يكون حافظين تعليمات ومتربيين عليها وعايشين بيها ، تحس انهم بارعين في تنفيذ التعليمات بحذافيرها وتقليد وتكرار نفس السلوكيات والحركات في البيت والشارع والعمل والمواصلات والمستشفيات والعيادات ، مش مهم المهم انهم ــ كمدخنيين ــ اتفقوا من غير لُقى ولا مواعيد على انهم ينفذوا التقاليد حتى صاروا ليها زي العبيد ، ومنهم ناس مثقفين ومتعلمين لكن بفضل التدخين أحيانا ينقح عليهم الكيف فيصبح الواحد منهم بلا إرادة وضعيف وكل همه انه يشفي غليله بسيجارة مهما كان الضرر والخسارة ..

المدخنيين دول حاجة عظيمة جدا ومثال رائع في الالتزام والاهتمام والانضباط بقوانين وعادات وتقاليد وتعاليم التدخين إللي هيّ أيه بقه ....؟؟!!

1ــ نفسي اعرف مين اللى حط القانون بتاع ان الواحد في سن المراهقة لازم يشرب سجاير ، لازم يجرب زي بقية الشباب لازم يخوض التجربة أه امال أيه ما هو دا سن لازم البني آدم يجرب فيه كل حاجة وبعدين يتوب ، عادي انا اشرب سجاير عشة خمستاشر سنة وبعدين أبطل وأبقى بطل في نظر الناس وأفضل أفرد عضلاتي في كل حتة وفي كل قعدة وأقول انا شربت سجاير وشربت جميع أنواع المخدرات بس لما نويت أبطل هي كلمة بطلت كله وتلاقيه أصلا بطل بضرب البلغة علشان ينفع يعيش أو يقدر يحافظ على اللى باقي من صحته ، وبعدين أيه البطولة ان الواحد يشرب سجاير ويبطلها ، انت ليه تشر أصلا ..؟؟!!

وبمناسبة المراهقة بقه وشرب السجاير في سن صغيرة اللى صار عرف والناس اعتبرته شيء عادي جدا وبيكرروه لغاية ما الأجيال حفظوه وطبقوه ، تلاقي المراهق من دول رايح مدرسته أو راجع منها ، أو رايح دروسه او راجع منها يحاول على قد ما يقدر يولع سجاير وهو في الطريق قبل ما يوصل المدرسة أو الدرس وهو رايح ، ويحاول برضه يولع سجاير على قد ما يقدر وهو راجع من المدرسة أو الدرس أو أي مشوار ، قبل ما يوصل البيت ، وطبعا تلاقي أحلى عطور علشان يداري ريحة السجاير وفيه ناس كانت بتاكل ورق كافور علشان يغطى على ريحة الدخان ، المؤسف والمخزي بقه انك تلاقي واحد صاحبك بيشرب سجاير في سن المراهقة تسأله انت ليه بتشرب سجاير ..؟؟ يقولك أصل اخواتي الكبار بيشربوا وبيخادوا مصروف أكبر مني عشان أبويا عرف انهم بيدخنوا ..!!! يا مشاء الله ..

2ــ نفسي اعرف مين حط قانون ان المدخن لازم يشرب علبة سجاير كاملة كل يوم ، يعني حاجة غريبة جدا لما تلاقي الناس في كل مكان لما يفكروا يحسبوا نسبة انفاق الفرد على السجاير يقولك لو حسبنا علبة سجاير ب 20 جنيه كل يوم  يبقى في السنة (......) ، هي نزلت في الدستور ان كل واحد بيدخن لازم يشرب علبة كل يوم يعنى حاجة تقرف ..

3ــ نفسي أعرف أيه المتعة إنك تشرب سيجارة كل ما تدخل الحمام ، أيه العلاقة بين البراز والسجاير ..؟؟!! مش عارف أيه ذنب أي حد يدخل الحمام بعدك ليه تظلمه وتخليه يشم دخانك وريحة سجايرك ..؟؟ ومين اللى علم المدخنين الموضوع دا لدرجة انهم كلهم أدمنوا تدخين سيجارة في الحمام ..

4ــ نفسي أعرف مين علمهم أنهم اول ما يصحوا من النوم أول حاجة يدوروا عليها هي الولاعة وعلبة السجاير ، حتى لو الواحد منهم صحي في نص الليل أو الفجر أول حاجة يفكر فيها هي علبة السجاير ويقولك فرصة أشرب سيجارة في الهدوء ده ، تحس انه صحي من النوم علشان يألف كتاب ويكتب قصيدة شعر أو يألف لحن جميل في هدوء أو يعني الراجل حرام نفسه طول النهار من السجاير وفرصة صحي يشرب سيجارة..

5ــ نفسي اعرف مين علمهم انه الواحد قبل ما ينام وتحديدا وهو ممدد على السرير لازم ولابد يشرب سيجارة يا نهار اسود ، أيه يا عم الحج انت ما شبعتش طول النهار حرق ونفخ وشفط حتى قبل ما تنام ، وذنبهم أيه المساكين اللى بيناموا جنبك أو معاك في نفس الأوضة سواء كان أخوك أو اختك أو ابنك أو بنتك أو زوجتك أو امك ، وأيه الظروف مع الناس اللى شقتهم أصلا كلها اوضة ..

6ــ نفسي أعرف مين علمهم ان الواحد أول ما يطلع من باب البيت وأول ما يحط رجلة في الشارع وقبل ما يمشي أربع خطوات على بعض لازم يولع سيجارة ..

7ــ نفسي اعرف مين فهمهم أن الواحد منهم أول ما يركب وسيلة المواصلات في ميكروباص أو أتوبيس أو قطر وأول ما يقعد على الكرسي لازم يولع سيجارة ، ولما تطلب منه يطفيها يبص لك بقرف وكأنك هاتحرمه من فرخة مشوية ، وإما يطفيها وهو عاوز ياكلك بنظراته ، وإمام يرد عليك ببرود شديد ويقولك انا هاطلع إيدي اللى فيها السيجارة من الشباك يعني مالكش حجة .

8ــ مين فهمهم ومين علمهم ان الواحد أول ما يوصل الشغل (مكان عمله) قبل ما يمضى حضور في الدفتر لازم يولع سيجارة ، لدرجة انى كرهت دفتر الحضور والانصراف ، وبقيت أنسى موضوع التوقيع علشان أهرب من تنفس الدخان على ريق النوم ، وعدم الاحتكاك بالزملا وعلشان ما يزعلوش (خلي بالك علشان مايزعلوش) ، الكلام دا بينطبق على جميع المهن والحرف لازم سيجارة يولعها تحية وصول العمل..

9ــ مين فهمك ومين علمك انك لما تروح تزور واحد عيان في مستشفى او عيادة أول ما توصل وتطمن على العيان تضرب إيدك في جيبك وتطلع علبة السجاير وتولع ، ويا سلام بقه لو حد قالك اطفي السيجارة يا سيد انت في مستشفى أو عيادة بيكون رد فعلك يعبر عن جهل ومرض نفسي في الحالتين الأولى انك تطفي السيجارة وتفضل قاعد منشكح ورافع راسك فوق ومنفوخ وكأنك عملت عمل بطولي ، والثاني انك تقول بكل بلادة هي يعني سيجارة هاتعمل أيه وبعدين انا قاعد جنب الشباك وفاضل فيها نفسين وتخلص ، يا عم انا قاعد ربع ساعة وماشي أصلا..

10ــ مين فهمك وعلمك ان من حقك تنفخ دخان سجايرك في مكان موجود فيه ناس غيرك سواء كان في البيت أو مكان عام (مستشفى ـ عيادة ــ مكان عمل مصنع أو شركة أو مدرسة ـ او وسيلة مواصلات عامة)

11ــ عاوز تشوف الابداع والتكنولوجيا اتفرج على المدخنين وعلى حركاتهم وهما بيولعوا السيجارة وبيخادوا منها اول نفس بحركة ميل الرأس وتحرك وعوجة الشفايف بشكل ياااااااه تحس ان الواحد منهم بيعمل عمل بطولي وبيتفنن في رمي عود الكبريت أو في طريقة قفل الولاعة بحركة معينة باليد حاجة بصراحة ملهاش وصف غير انك بعد كده لازم تلاحظها بنفسك هاتلاقي فيها انشكاح غير عادي خصوصا في المدخيين صغار السن..

12ــ مين قال ان الواجب في ــ مناسبات الأفراح والعزاء والطهور ــ يكون بالسجاير والشيشة وما يتبعها من لزوم القعدة تلاقي الواحد لسه طافي السيجارة ، يقوم أيه واحد يعزم عليه ويحلف طبعا لازم ياخد منه السيجارة ويولعها علشان اللى عزم عليه مش يقع في الحلفة (والحلفة طبعا فيها شوك) ، قوم أيه ييجي واحد تالت ينضم للقعدة يعزم عليهم ويحلف ، وهكذا وهكذا ...

13ــ المصيبة السودة ان المدخنيين في كل مكان ملتزمين بالصفات دي والسلوكيات دي أكتر من التزامهم بأي حاجة تانية في الحياة ، لدرجة انك ممكن تحس أحيانا ان منهم ناس كتير عايشين مخصوص علشان السجاير ، يعنى الواحد منهم وهب عمره وحياته فداء للسجاير ويتفانى ويضحى من أجل عيون علبة السجاير ومن أجل إرضاء علبة السجاير ويتمنى ليها الرضى ترضى..

14ــ بصراحة الواحد منهم أحيانا درجة اهتمامه بعلبة السجاير بتكون اكتر من اهتمامه بأولاده ، بصراحة يعني حاجة تفضح وتكسف ..

15ــ اوعى تفتكر ان الظروف المادية للمدخن بتتغير لما يتعرض لضائقة مالية بالعكس دا في مدخنيين بيجاهدوا في سبيل توفير تمن علبة السجاير قبل رغيف العيش وممكن يقسم الفلوس اللى في جيبه نصين نص للسجاير ونص لمصاريف البيت ، ويا سلام بقه لو الحالة بقت حلوة والقشية بقت معدن والظروف اتحسنت والفلوس جريت ولعبت في إيده لازم يطور من نفسه ويدخل اغلى أنواع السجاير وممكن يشرب معاها إضافات تانية بانجو حشيش ، طالما في فلوس ، طبعا بتبقه عيبه كبيرة في حق أي مدخن أنه يكون غني وبيشرب سجاير حاف ..

طبعا أي حد بتحاول تعترض عليه وتطلب منه انه مش يدخن في مكان عام بحسسك انك ارتكبت جريمة في حقه وملامح وشه بتتشقلب ميت لون في ثوان ، ومن المواقف البايخة اللى مريت بيها في حياتي ، لما كنت شغال أخصائي اجتماعي بالأزهر ، وكنت اطلب من بعض المدرسين عدم التدخين قدام الأولاد في الملعب أو الفصل أو أي مكان داخل المعهد كانوا بيزعلوا جدا جدا ويغضبوا ويحسسوني اني ارتكبت جريمة كبرى في حق علبة السجاير والسيجارة..

مفيش فرق بينك وبين أي سلفي متعصب متشدد هو بيفرض فكره على الناس ومش حاسس انهم ليهم حق في التفكير واختيار رأي مختلف أفضل من رأيه السلفي المتخلف والمتعفن ، وانت بتفرض على غيرك يتنفس هباب وزفت وتلوث وبتحرمه من حقه الطبيعي في تنفس هوى نضيف نقي خالي القاذورات ، حتى لما تطفي السيجارة لما حد يطلب منك بتطفيها وانت جواك إحساس انك بتمن عليه وبتعطف عليه وبتتنازل ، زيك بالظبط زي السلفي المتشدد اللى اذا حصل واحترم مرة في حياته حرية أي حد بيحس من  جواه انه من عليه ووهبه فرصة تاريخية في انه يعيش لحظة حرية..

أخر حاجة هاقولها لو المدخنيين دول التزموا وركزوا في شغلهم وفي بقية أمور حياتهم نفس تركيزهم واهتمامهم وانضباطهم وولاؤهم لعلبة السجاير والله العظيم يمكن حال البلد دي يتغير ويكون أحسن ..

اجمالي القراءات 4132

للمزيد يمكنك قراءة : اساسيات اهل القران
أضف تعليق
لا بد من تسجيل الدخول اولا قبل التعليق
تاريخ الانضمام : 2006-08-21
مقالات منشورة : 258
اجمالي القراءات : 3,629,740
تعليقات له : 2,475
تعليقات عليه : 1,178
بلد الميلاد : مصر
بلد الاقامة : مصر