رئيس مصر الذى فى خاطرى

مؤمن سلام في الجمعة 17 يونيو 2011


 

مصر حاليا على مفترق طرق والثورة منتهتش فى رائي فاحنا لسة مش عارفين اذا كان الجيش حيسيب السلطة ولا لا واذا سابها وبقت ديمقراطية فعلا مين اللى حيقدر يحكم البلد الليبراليين ولا الناصريين ولا الاخوان

لكن انا قررت احلم انها حتكون دولة ديمقراطية فيها انتخابات حرة وان فى مرشحين كتير حيخوضوا الانتخابات وفكرت فى الاسامى المطروحة على الساحة بس للاسف ملاقيتش حد فيهم يمشى مع رؤيتى لحاكم مصر اقدم دولة فى التاريخ لأقدم أمة عرفها التاريخ

عشان كدة قررت اقعد واكتب انا عايز رئيس مصر يكون اية؟ وعشان اجاوب على السؤال دة كان لازم اجاوب عن الاسئلة الكبرى اللى هى

مصر عربية ولا اسلامية ولا مصرية؟

انا شايف ان مصر مصرية وان الامة المصرية هى امة مستقلة فاحنا مش عرب بحكم حاجات كتيرة من اول التاريخ والجغرافية والجينات الوراثية لحد طريقة الاكل والشرب واللبس فعشان كدة عايز رئيس يؤمن بالامة المصرية وان مصر ومصالحها القومية هى المقدمة على كل شيئ والرئيس اللى بيؤمن بمصرية مصر مش حيخش فى مغامرات ومهاترات تضيع ثروات مصر وارواح اولاد مصر فى مغامرات عسكرية فى بلاد العرب من اجل زعامة وهمية على البلاد العربية وطبعا دة مش معناة اننا حنعادى الدول العربية او نعلن عليها الحرب بالعكس انا شايف ان مصر لازم تكون دولة سلام مع كل دول المنطقة لكن علاقتنا مع الدول العربية والاسلامية حتكون علاقة قائمة على المصالح فقط لاغير زى ما السياسة بتقول يعنى الدولة اللى علاقتنا بها حتحقق مصلحة اهلا وسهلا الدولة اللى حتهدد مصالح مصر وامنها القومى تاخد على دماغها يعنى عايز رئيس مصر يبطل نغمة الاشقاء العرب ومصر الشقيقة الكبرى والكلام اللى جاب مصر ورا وخلاها ملطشة للي يسوا واللى ميسواش

ودة طبعا يقتضى تعديل المادة الأولى من الدستور اللى بتنص على اننا جزء من الأمة العربية  والغاء المادة التانية اللى بتخلى مصر دولة اسلامية واسم مصر يبقى دولة مصر او جمهورية مصر

يعنى رئيس مصر لازم يكون شعارة مصر فوق الجميع ومصر اولا

مصر دولة ديمقراطية ولا ديكتاتورية ولا ثيوقراطية؟

طبعا عايز دولة ديمقراطية ومش عايز اول انتخابات حرة تكون هى اخر انتخابات فى مصر يعنى الرئيس لازم يكون بيؤمن بالديمقراطية من اعماق قلبة وبيدافع عن الحرية وحقوق الانسان بكل جوارحة وانا شايف ان اللى تنطبق علية المواصفات دى لازم يكون شخص ليبرالى لان بصراحة الناصريين سجلهم ميطمنش وتاريخهم يقلق فى الموضوع دة من ايام عبد الناصر وحتى الدول اليسارية بالذات اللى ظهرت جديد فى امريكا اللاتينية تخوف ممكن تشوفوا قرارت شافيز رئيس فانزويلا حتلاقوا قرارات وسياسات مصادرة وتاميم صحيح على نطاق ضيق بس برضوا تخوف. اما الاسلامجية فدة الرعب كلة دى ناس شايفة ان الديمقراطية كفر وزى اكل لحم الخنزير وان الانتخابات حرام وان المراة حرام تبقى رئيس او وزير وان غير المسلمين مكانهم خدم عند المسلمين فلايمكن طبعا اختار رئيس اخوانجى او حتى حليف لهم لان الحلف السياسى بيكون قايم على هات وخد فعشان الاخوان ترشحة يبقى اكيد اداهم حاجات تمشى مع فكرهم الثيوقراطى

رئيس شايف ان المصريين كلهم سواء لا يهمة انت دينك اية ولا لونك اية ولا جنسك اية يهمة انك مصرى وبس كفء وقادر على الانتاج والعمل تتقدم الصفوف بغض النظر عن اى اعتبارات اخرى كسلان وخايب وغير مؤهل يبقى تعد فى بيتكم حتى لو كنت ابنة

عشان كدة عايز رئيس ليبرالى

إقتصاد مصر يكون حر ولا موجهه ولا نصب باسم الدين؟

انا اعتقد ان عصر الاقتصاديات الموجهه والقطاع العام قد انتهى واحنا فى مصر عندنا تجريبة مريرة مع هذا النوع من الاقتصاد سواء عند اقامتة بتأميم الشركات المملوكة لمصريين او المملوكة للأجانب وحجم السرقات التى تمت فى لحظة التأميم ثم سرقات بخلاف الفساد وانخفاض الانتاجية اثناء ادارتة مما تسبب فى خسائر رهيبة للاقتصاد المصرى ثم كانت المصيبة الكبرى عند التخلص منة وبيعة سرقات وعمولات وتسريح عمال يعنى مشاكل اقتصادية واجتماعية

فلا اعتقد ان احد يريد اعادة هذه التجربة البائسة لكن برضوا فى ناس حتخاف من اللى شافتة فى اخر سبع سنين فى مصر ناس بتتغنى وناس بتتفقر احب اقول هنا ان السبب ليس اقتصاد السوق ولكن السبب هو غياب الشفافية والرقابة والمحاسبة مما فتح الباب واسعا للفساد والسرقة لكن فى ظل ديمقراطية حقيقية سيعود البرلمان الى دورة الاساسى وهو الرقابة واصدار التشريعات يعنى حتصدر تشريعات ضد الاحتكار وضد الغش التجارى وضد استغلال النفوذ وحتكون الحكومة تحت رقابة صارمة من البرلمان وفى الديمقراطية الحقيقية سيادة القانون هى الركن الاساسى للدولة يعنى من اول رئيس الدولة لحد اصغر موظف ممكن يتحاكم لو خرق القانون. وبالتالى عائدات النمو الاقتصادى حتعود على الشعب مش على رجال الحكم زى النظام السابق فى صورة زيادة فى فرص العمل وزيادة فى المرتبات وخدمات صحية وتعليمية أرقى.

عشان كدة عايز رئيس يؤمن بحرية الاقتصاد وبالعدالة الاجتماعية

ياريت لو فى مرشح بالمواصفات دى تقولولى  عشان انتخبه

اجمالي القراءات 6756

للمزيد يمكنك قراءة : اساسيات اهل القران
التعليقات (1)
1   تعليق بواسطة   محمد عبد المجيد     في   الجمعة 17 يونيو 2011
[58506]

مؤمن سلام والمصرية والعروبة والانعزالية

الأخ مؤمن سلام،


 


كلام غريب يشد أذن التاريخ ليجبره على الاعتراف بأشياء ليست موجودة.


أنا مصري وعربي أتكلم اللغة العربية، واٌقرأ فيها، وأفتح صفحات النت لأقرأ مقالا في صحيفة كويتية أو مغربية أو لبنانية، وتأثرت بمالك بن نبي الجزائري، والكواكبي والأفغاني.


بيني وبين العرب عشرات الاختلافات، وبيني وبينهم آلاف الأشياء المتوافقة والمنسجمة.


أنا مصري، لكنني سوري ويمني وليبي وفلسطيني وقطري وموريتاني وتونسي.


والتاريخ المشترك بيني وبين العرب لا تخطئه عينا أي مؤرخ.


الانعزالية هي سرقة ثروتي التراثية واللغوية والتاريخية والجغرافية .


 


محمد عبد المجيد


طائر الشمال


أوسلو  النرويج


أضف تعليق
لا بد من تسجيل الدخول اولا قبل التعليق
تاريخ الانضمام : 2011-05-09
مقالات منشورة : 10
اجمالي القراءات : 136,910
تعليقات له : 0
تعليقات عليه : 9
بلد الميلاد : Egypt
بلد الاقامة : Egypt