الزنا الحلال ، وسوق الجوارى والإماء عند الوضوء بالماء .

عثمان محمد علي في الأحد 26 ابريل 2015


اعتذر عن أن المقالة باللغة المصرية الدارجة (العامية ) لأنها  كانت للفيس بوك ،وقلت مفيش مانع نعرضها  ايضا على كُتاب وقراء أهل القرآن الكرام .

إفضحوهم .ولاد الإيه . عبدة البخارى ،والطراش .
- الزنا الحلال ، وسوق الجوارى والإماء عند الوضوء بالماء .
حديث للبخارى ، وحدث بالفعل .
اما الحديث فبالعامية يقول البخارى عليه لعنة الله والملائكة والناس أجمعين عن الزنا الحلال ( أيما رجل وإمرأة توافقا فعشرة ما بينهما ثلاث ليال ،فإن أرادا أن يتزايدا تزايدا ،وإن ارادا أن يتتاركا تتاركا ) . يعنى لو واحد عايز يتجوز واحده يروح ينام معها (جنسيا ) لمدة 3 ايام تحت التجربة والإختبار ، لو عجبته أو هو عجبها فيكملوا على بركة البخارى ويتجوزوا بعد كده ،ولو معجبهمش الحال ،يادار ما دخلك شر ،وكل واحد فى حاله ،ويشوف غيرها ،وهى تشوف غيره ، ويكرروا الحكاية ويطبقوا الحديث ،وفشر أجدع وأتخن فيلم بورنو فى العالم ، وتسقط كل بيوت الدعارة أمام دعارة  البخارى الداعر ...
أما الحدث ..

ايام الجامعه 81-83سكنت 3 سنوات بالمطرية بجوار مسجد زهرة الإسلام الشهير . . وكنت مواظب على صلاة الجماعة بالمسجد بعد عودتى من الكلية ،وغالبا كانت المغرب والعشاء (والفجر احيانا لما اكون سهران للمذاكرة ) . وفى  بعض الأيام اقوم بإلقاء درس ما بين المغرب والعشاء أو بعد صلاة العشاء عبارة عن شرح بعض ايات التوحيد فى القرآن الكريم ،وإنكار الشفاعة وعذاب القبر ، وعلم الغيب وما شابه ذلك مما كُنا مركزين عليه  وقتها . وكان يُصلى معنا يوميا تقريبا .مجموعة من الجماعات الإسلامية ،او الإخوان (لأنى وقتها ما كنتش بأفرق بينهم تقريبا من حيث السلوك والفكر ،وكلهم كانوا عندى فى سلة واحدة ) . وكان يأتى للمسجد كل يوم خميس .جماعة من جماعة التبليغ والدعوة من مسجد أنس بن مالك اتباع إبراهيم عزت وقتها ،الجماعة بتوع الخروج فى سبيل الله ،والحكاية دى ...

المهم شافونى موجود على طول وبأقول خطب وكلمات فى الجامع وبتاع ،وأزهرى (صيدلة الأزهر ) . فالجماعة بتوع الجماعة الإسلامية ،قالوا بس الواد ده لقطة ولازم ناخده معانا ونكلفته .ففى يوم لقيت 3 منهم جايين البيت ،والسلام عليكم يا أخ عثمان ، وووو ، وبعدين دخلوا فى الموضوع . بصراحة إحنا مستخسرينك وعايزينك معانا فى الجماعة خطيبا ،وازهريا ،وإحنا حنجوزك اخت من الأخوات  ونتكفل بتعليمك ومصاريفك ،وبشغلك بعد كده ..طيب يا سيدى حتجوزونى إزاى ؟؟ دا انا أفقر من الفقر ، وساكن عند قرايبى شبه مجانى ، ومصاريفى الشهرية بيرسلها لى استاذى وعمى (الدكتور -منصور ) كل شهر .. طيب حأتجوز إزاى هههههههههه. فقالوا بص يا سيدى . إنت حتيجى معانا بكرة المسجد فى جامعة عين شمس ، وحتدخل ميضة الأخوات (مكان وضوء بنات الجماعة ) واللى حتعجبك اسألها عن إسمها ،وقل لنا عليها ، وهى كمان حتيجى تقول لنا .. فقلت العيال دى شاربه إيه بالظبط فقلت أتسلى عليهم . فقلت لهم طيب دول كلهن منتقبات أو محجبات طيب حتعجبنى إزاى ؟؟؟ فقالوا لى لا ما هو فى المناسبات دى الأمير بيديهم أمر .يخلعوا الحجاب والنقاب ،ويشمروا ايديهم ورجليهم ،ويفتحوا حتة من زراير البلوزات . فقلت ده انتوا حاجة عسل خالص ، طيب وبعدين قالوا خلاص لما بتعجبك واحدة بنتخذ القرار ، والإخوة بيشوفوا لكم أوضه ،ويجهزوها ، ونعمل الفرح ،ونصرف عليكم لغاية لما تخلصوا تعليم ،وبعدين تردوا اللى عليكم بعد ما تشتغلوا ،وتساعدوا ناس تانية وهكذا .. المهم انك تبقى معانا ..... فقلت معلش يا جماعة جيتوا متأخرين  وضحكت وقلت لهم حجرات القلب الأربعة  كلها مشغولة ...وانا تقريبا مش ممكن أتفق معكم ، انا لا بتاع جماعات ،ولا اقبل ان يكون لى امير ولا كلام من ده ...
فهم فعلا بيطبقوا كلام البخارى بحذافيره ......
وفيديو القوصى اللى حتشوفوه  يعتبر بالنسبة لهم من الأمور البديهية  بجوار حديث البخارى ، وحاجة  سهلة خالص كأنك بتتمضمض للوضوء ....
لعنة الله على الظالمين الذين يفترون على الله ورسوله ورسالته .

 

اجمالي القراءات 12260

للمزيد يمكنك قراءة : اساسيات اهل القران
التعليقات (6)
1   تعليق بواسطة   عبدالرحمن المقدم     في   الإثنين 27 ابريل 2015
[78103]

انا اسف جدا جدا جدا ---


محشش وشارب بانجوا مضروب ؟



2   تعليق بواسطة   عبدالرحمن المقدم     في   الإثنين 27 ابريل 2015
[78104]

فيه ايه يا عم عثمان -


الدين يسر يا اخي - انت عاوز تضيق علي الناس ليه مش يبقي حرام عليك - انا طبعا مطلع من البخاري حاجات كتيرة - بس الفيديو دة كوكتيل مشخرة - بجد يا عثمان انت فايق ورايق علي الاخر لا استطيع ان اتوقف عن الضحك لو سمحت


3   تعليق بواسطة   عثمان محمد علي     في   الإثنين 27 ابريل 2015
[78105]

يا سيدى ربنا يسعدك .


اهلا بك وربنا يسعدك  على طول استاذ عبدالرحمن المقدم .. حنعمل إيه بس . المهم أن نستمر فى فضحهم ،وفضح تراثهم وسلوكياتهم الإرهابية من ناحية ،والمُشينة من ناحية تانية ...



وتستطيع أن تُشارك بما إستخرجته من البخارى بصورة نقدية  فى تعقيبات أو مقالات لنستفيد منها  جميعا ...



4   تعليق بواسطة   مراد الخولى     في   الإثنين 27 ابريل 2015
[78106]

You made my day Dr Othman!!


أنا الأن فى حالة ضحك غير متوقف وزملائى هنا يسألون لماذا الضحك المتواصل? قلت لهو كنت أشاهد مسرحية قديمة!! 


وجهى أصبح لونه كالتفاحة هههههههههه.


ابقى رد على الإيميل يا رجل!! لقد بعثته منذ شهر!!


5   تعليق بواسطة   مهدي مالك     في   الإثنين 27 ابريل 2015
[78107]

منكم نتعلم


يا استاذي العزيز انني بدات اشق طريقي معكم كموقع اهل القران حيث تعلمت منكم الشيء الكثير فانني امازيغي مسلم من المغرب ادافع عن امازيغية المغرب و كما ادافع عن الاسلام المساير مع قيم  هذا العصر .



يشرفني ان نكون اصدقاء نتبادل الرسائل عبر  الفيسبوك قصد التعارف حيث نحن مسلمون تجمعنا نفس الافكار تقريبا 



6   تعليق بواسطة   عثمان محمد علي     في   الإثنين 27 ابريل 2015
[78108]

حاضر استاذ مراد الخولى .... ويشرفنا استاذ مهدى مالك


شكرا لكما استاذ مراد ،واستاذ مهدى .على تعقيباتكم  الجميلة ،والتى تُشجعنا على مواصلة المسيرة ... أخى مراد باشا . انا آسف فانا لم أفتح الإيميل منذ فترة ، بسبب الفيسبوك الله يسامحه جعلنا نستغنى تقريبا عن الإيمييل ، وحاضر حأفتحه واشوف رسالة حضرتك ...



اخى العزيز استاذ مهدى مالك يشرفنى  طبعا صداقتك الكريمة  على الفيس بوك . وحسابى  هو .



Othman ali



وعليه نفس صورتى  التى على صفحتى بموقع اهل القرآن ...وأهلا وسهلا بحضرتك .



أضف تعليق
لا بد من تسجيل الدخول اولا قبل التعليق