خليك فى حالك:
خليك فى حالك

نورهان عثمان محمد على في السبت 13 سبتمبر 2008


خليك فى حالك 
اسمحولىكتب الموضوع باللغة الدارجه أو العاميه ،لأنى نشرته فى المرة الاولى على صفحة (جروب –مجموعة فضفضه-على ال facebook) ومينفعش اغيره واكتبه باللغة الفصحى . واحب انوه عن ان مش كل الملاحظات الموجوده تعرضت لها بصفة شخصيه ،لكن اكيد سمعتها من زميلاتى او من بعض سيدات المجتمع .

يمكن موضوع الحوار مختلف شوية عن اسم الجروب(فضفضة من القلب)
بس مش شرط تكون الفضفضة دى بس فى الحب.


بس ياريت اللى يقرا يكمل الموضوع لاخره لان الموضوع ليه جوانب كتير مهمة مح&EcirEcirc;اجين ناخد بالنا منها، ولو فى حد مننا بيعمل الحاجات دى يحاول يبطلها لانها من اسوأ العادات.
نتكلم بقي فى الموضوع.
يا جماعة موضوع الاعتداء على حرية الاخرين والتدخل فى شئون ملناش علاقة بيها ، وعدم احترام اراء الآخرين ، والنميمة على اى حد حتى لو ماشي فى الشارع ومنعرفش عنه حاجة بقت حاجة منتشرة وسخيفة قوى وغير محترمة .وانا اقصد بكلمة التعدى على حرية وحقوق الاخرين الحقوق الدينية والدنيوية .يعنى مثلا الراجل اللى بيشرب سجاير فى اى مكان يدخله ، دة واحد بيتعدى على حقوق الاخرين فى الراحة فى المكان اللى هما فيه، هما مش داخلين عشان يتخنقوا او يتضروا صحيا.دى حاجه .
وحاجه تانيه .
الناس بقي اللى بتسأل فى اللى ملهاش فيه خالص دى يعنى مثلا.
1هو انت متجوزتش ليه لحد دلوقتى؟
2هو انتى مش محجبة ليه؟
3هو انتى ليه لابسة كدة؟
3هو انتى ليه متلبسيش اسدال؟ (الإسدال نوع من انواع الحجاب )
4هو انت ليه متحاولش تبصى كدة فى القرأن وتقارنى بين الدين الاسلامى والمسيحى (الاسئلة فى الموضوع دة كتيرة اوى اوى واشكالها مختلفة)
5 الست دى ماشية كدة ليه؟
6هو الراجل دة لابس كدة ليه؟
7ايه دة ايه حد فى الدنيا يلبس احمر على ازرق؟ دة طبعا واحد بينم على واحد ميعرفوش اصلا .
8هو ليه مش بيشترى هدوم كتير ويغير فى لبسه؟
9دى اكيد بنت قليلة الادب طالما ماشية مع اولاد؟ (وطبعا ممكن تكون ياعينى ماشية مع اخوها ولا خطيبها ولا جوزها )
10هو انتوا ليه اتطلقتوا؟
11ولما تيجى تتكلم فى التيفون تلاقي واحد متعرفوش اصلا بيقللك كنت بتكلم مين؟
12هى ليه بتتكلم فى التليفون وهى ماشية فى الشارع ؟.. يا عم دى بتتمنظر علينا، آل يعنى محدش غيرها معاه موبايل. (على اساس انه متأكد انها بتتكلم عشان تغيظه مثلا)
13انت ليه بتحب النوع دة من المزيكا ؟ (سؤال غبي طبعا)
14انت ليه مدايق اوى كدة ؟ (ولو قال مثلا مفيش حاجة مدايقانى او قال معلش دى حاجة خاصة اللى قدامه يزعل ويتخنق ويقول دة بيتكبر عليا مع إن تبقي ممكن علاقتهم مكملتش اسبوع)
15انتى ليه تخينة اوى كدة ؟ ( متخسي)
او انتى ليه رفيعة اوى كدة ؟ (انتى لازم تتخنى شوية
مع ان اللى بيقول كدة دة ممكن يكون مفيش علاقة بتربطه باللى قدامه ابدا )
16انتى ليه صابغة شعرك اللون الغبي دة؟ (طبعا هنا مفيش احترام للاذواق خالص)
17هو انتى او انت مرتبط ؟؟ (بردو ممكن حد حشري يسألك السؤال دة وهو ملوش علاقة بيك ولا حاجة خالص)
18انت على فكر رأيك متخلف جدا؟
(هنا طبعا مفيش اى احترام للاراء ودى جملة بس مختصرة فى اشكال كتيره من الكلام اللى مفهوش احترام للاراء)
19انت ليه مبتقلش السلام عليكم؟ ليه بتقول مساء الخير؟

 دى بعض الجمل اللى مش بتعجبنى  لو قعدت اقول فى جمل زى كده مش هخلص.
الجمل دة ممكن نقبلها من حد قريب قوى مننا ،انما مش من اى واحد كدة يسأل فى اى حاجة.
دى حاجة حاجة تانية مهمة قوى بقي،سواقين التاكسي الرغايين اوى دول اللى الشكوى زادد منهم قوى ، نفسي يرحموا أ نفسهم من التدخل،يعنى مثلا وحدة ولا واحد يركب معاه ،يبتدى ، هو انت بتشتغل ايه هو انت مش عارف ايه؟؟
هتقللي ناس طيبين وغلابه ، حأقول لك ماشى . بس ميتكلموش فى حاجات شخصية.
فهل الناس مش عارفين كلام ربنا ((( يَا أَيُّهَا الَّذِينَ آمَنُوا لا يَسْخَرْ قَومٌ مِّن قَوْمٍ عَسَى أَن يَكُونُوا خَيْرًا مِّنْهُمْ وَلا نِسَاء مِّن نِّسَاء عَسَى أَن يَكُنَّ خَيْرًا مِّنْهُنَّ وَلا تَلْمِزُوا أَنفُسَكُمْ وَلا تَنَابَزُوا بِالأَلْقَابِ بِئْسَ الاِسْمُ الْفُسُوقُ بَعْدَ الإِيمَانِ وَمَن لَّمْ يَتُبْ فَأُوْلَئِكَ هُمُ الظَّالِمُونَ ))
انا حصل معايا موقف غريب جدا يمكن هو اللى خلانى اتشجع انى اتكلم فى الموضوع
انا كنت فى عيادة والدتى وكنت بأسمع برنامج العاشرة مساء فى التليفزيون ،وكمان كان موجود بعض السيدات منتظرين دورهم فى الدخول للكشف ،
المهم خرجت اتكلم فى الموبايل ولما رجعت لقيت واحدة منهم قفلت التليفزيون من غير ما تستأذن ،انا دخلت بصيت كدة ،فقالت لى انا اللى قفلته اصلى مش قادرة اسمع حاجة.انا بصراحة مردتش عليها بس جه ف بالى على طول انها عملت حاجة مش من حقها.
ولا الناس بقي اللى عايزة تعرف كل حاجة عن حاجة وبتتكلم فى كل حاجة
لو واحدة مثلا مش محجبة يفضلوا يتكلمو ويجيبوا الكلام يمين وشمال عشاان يعرف اذا كانت مسلمة ولا مسيحية؟
وكمان مبقاش فى حاجة اسمها احترام للاديان ابدا--
ومبقاش فى احترام لاراء الاخرين ولا بقي فى احترام لانه وارد جدا ان اذواقنا واراءنا وسلوكنا وعاداتنا تختلف .ياريت ناخد الناس زى ما هى. منحاولش نفرض رأينا عليهم .
يعنى مثلا لو اتعرفت على واحد ندل وانت عارف انه ندل مش كل بقي ما يعمل موقف نداله تزعل منه مانت خلاص عرفت انه ندل اتأقلم بقي او سيبك منه خالص وريح نفسك.
قولولى بقي يا جماعة ليه الناس مبقتش بتحترم لا اراء حد ولا دين حد؟
مش هقول ان الغرب احسن مننا فى كدة ولازم نكون زيهم لا.
هقول ان الاديان وربنا سبحانه وتعالى امرنا بإحترام الأديان ونهانا عن النميمة والكلام عن الناس والكلام على الفاضى وعلى المليان والتدخل فى شئون الغير.
وفى موضوع كمان مهم قوى ،وانا شايفه ان بعض الناس فاهمه غلط ،وهو.
انه لما يقول لواحد اقرا فى المصحف علشان كده تعمل خير وتاخد ثواب .ويكون عارف انه مسيحى مثلا .
طب مهو فى مليوووون حاجة خير ممكن تعملها غير دى وممكن لو يعنى لازم قوى تدعو للاسلام. انت ممكن تدعو للاسلام بتمسكك بيه وباحترامك ليه .
لاننا لو تمسكنا بتقاليد وعادات الاسلام هنبقي احسن شعوب العالم احتراما وتقدما وكل حاجة .وهنا نبقى بندعى للإسلام بهدوء وبالراحه وبطريقه عمليه .و بكدة ممكن ندعو للاسلام دين الرحمة .

انا اسفة قوى طولت عليكم بس بجد الموضوع مهم عندى قوى .
اتمنى ان اجد ردودا ومناقشات فى هذا الموضوع المهم حتى استفيد من المناقشات والاراء ،
وارجو من حضراتكم ان تناقشونى اذا كان لى اخطاءا فى ارائى.
----هذه بعض التعليقات على الموضوع على ال facebook
الموضوع روعه روعه بجدددددد
وفعلااااااااااااا اا مخنوقه منه جدااااااااا
بس خدي بالك
انا لو في حد يهمني اقوله مثلا اني شايفه حاجه وحشه عليه
ولازم ياخد باله منه
علشان انا بحبها وتهمني
بس لو مش هيهمني هتكسف اني اقول راي بجرائه
بس انا جد مبسوطه كتييييييير من اسلوبك
ومش جديد عليكي التفكير الجامد ده ربنا يحميكي يابنتي والله
....................................................
اولا انتى بجد كلامك اكتر من جميل خالص بس انا هقولك حاجه يا نورهان بالنسبة لموضوع الناس بتوع االاسلام انا مش معاكى اوى كده بس لازم نفتكر قول الله تعالى "لا اكــــــــراه فى الدين قد تبين الرشد من الغى " انا اقولك حاجه لو الواحد اتكلم مع اصحابه او زمايله القريبيبن عن الاسلام وهو بردو عن المسيحيه ايه المشكلة انا اقولك انا الحمد لله ليا دلوقتى صاحبتى جدا جدا جدا كانت كرستينـــــــــــا دلوقتى بقت منة الله وده فضل من ربنا مش منى ولا من اى حد وبالنسبة لكلامك التانى كلو تمام والله رايك فعلا جميل بس بردو انا عن نفسى فى ناس يا نورهان بيبقوا محتاجين يفضفضو مفيش مشكلة خالص لكن اللى يتسمى نميمة او الرياء ربنا يبعدنا عنو خالص ف الاخر بشكرك اوى اوى الموضوع جميل خالص ويا رب ما اكون طولت ورخمت ســـــــــــ نورهان ـــــــــــلام ربنايسعد شباب المسلمين شكرا ...................................................... 

 انا بحترم رايك جدا
بس انا بكرر تانى ان كلامى عن الناس ال انت اصلا ملكش علاقة جامدة بيهم
وبيتدخلو فى شئونك
متقنعنيش ان لو واحد مسيحى انت اول مرة تشوفه وقاللك انت ليه مسلم او كلمك عن دينك دى حاجة هتبسطك ،لا طبعا ..................................................

موضوع جميل اوى
فعلا ربنا يرحمنا من الناس الحشريه دى
وانا بايد كلامك يا نور
مفيش حد ليه الحق انه يكلم حد فى حاجه وهو مش يعرفه بطريقه حشريه
انما فى طرق تانيه
موضوع جااااااااااااااااااااامد
................................................... هو مين ده الى يخلى فى حالو
هو فى حد فى حالو
...................................................

هو فعلا ف ناس بتتدخل ف شؤون الناس التانيه وبتدخل ف خصوصيات هي ملهاش فيها خصوصا لو ناس مش قريبين منا
المفروض الانسان يسيب الناس ف حالهاتعمل ال هي عايزاه وميتدخلش فيما لا يعنيه
بس ليه تعليق ف ان احنى نسيب الناس في حاله من الناحيه الدينيه
هو الرسول قال لكم دينك وليه دين ده كان للكفار واهل الكتاب بس طول ما هم بعيد عن الاسلام بس لما تصدر منهم اهانات للاسلام طبعا منسكتش عليه
اما بالنسبه بين المسلمين ف الكلام ده مينطبقش عليهم
لان الرسول عليه الصلاه والسلام قال (( من رأى منكم منكرا فاليغيره بيده فأن لم يستطع فبلسانه فان لم يستطع ف بقلبه وهو اضعف الايمان)) ه
سواء كان المكنر ده واحده مسلمه لابسه ديق -او مش لابسه اشرب
او فعل يخالف تعاليم الاسلام ده واجب ع كل مسلم من رأى كده يغيره يا اما بيده او بلسانه او بقلبه وهو اضعف الايمان
وبردو يجب علينا امر الناس بالمعروف ونهيهم عن المنكر سواء كنا نعرفهم او منعرفهمش
اما الناس ال بتطلع بأراء جديده وغريبه ف الدين فالناس ده لازم تتحارب ونقف قدمهم ونصدهم
انا طولت عليكي ف الرد بس فعلا موضوعك حلو جدااااااااااااااااا
.................................................
انت دخلت ف موضوع مختلف عن كلامى -انا مقلتش ان فى حد يهين الاسلام ونسكت لا طبعا
بس مش مجرد ما تشوف واحد مسيحى تقلله اسلم. لا طبعا فى طريقة تانية وهى التزامك بدينك اللى هو الاسلام .قدامه وقدام نفسك اهم .واحترامك لدينك .
..............................................
جد موضوع جميل جداااااااااااااااا
فعلا الموضوع احيانا كتير بينرفز
بس اعتقد ان الناس اتعودت ع كده خلاص
يا بنتي الشعب المصري ده هو الشعب الوحيد اللي بيحشر نفسه ف كل حاجه
هو الشعب الوحيد اللي فاهم ف كل حاجه
الشعب الوحيد اللي بيسأل ع كل حاجه
والناس خلاص اتعودت ع السخافه دي
انا معاكي طبعا ان لازم يكون في احترام للاذواق
احترام للفكر
يعني انا مجيش افرض رأيي ع حد حتى ولو كان صاحبي
انا ممكن انصحه بحكم ان انا شايف الموضوع من برا
هو علشان صاحب الموضوع بيبصله من ناحيه واحده
بس ف النهايه هو حر
ودي مفيهاش اي مشكله
وحتى لو في موضوع مختلفين فيه
لازم يكون في الرأي والرأي الاخر
لازم يكون في ثقافه الحوار
لازم احترم رأيك زي ما انت كمان لازم تحترمي رأيي
لازم يكون في احترام لحريه الاعتقاد
يعني حتى ف الدين؟؟؟؟؟؟؟؟؟
اه طبعا حتى ف الدين
بس مفيش ما يمنع ان انا احاول انصح الانسان اللي قدامي
وهو حر ف النهايه
بس الاسلام دين عمل
الدعوه للدين فيه مهمه جدا
بس ب الحسنى
والدعوه مش شرط تكون ل غير المسلم
دي من باب اولى تكون للمسلم علشان يصح اسلامه
يعني انا لو شفت شاب مثلا بيعاكس واحده
وانا اعرفه
او حتى معرفوش
ايه المشكله اني اقولله ده مش من الدين
ده بيكون من باب النصيحه
من باب :وذكر فأن الذكرى تنفع المؤ منين:
انما انا معاكي ان التدخل ف شؤن الغير ده موضوع رخم جدا
بس عزاءنا الوحيد ان الناس اتعودت عليه
وسلامي ل كل المشتركي
----------
وصح اننا لازم نحترم حتى اعتقادات الناس الدينية ودة اللى انا بتكلم فيه
بس بردو مينفعش اقول ان خلاص الناس اتعودت لازم نحاول نتغير بايدينا شوية شوية حتى لو معرفناش نغير الناس نحاول نغير اخوتنا واولادنا الجيل اللى جاى
نربيهم على احترام الغير.

اجمالي القراءات 14299

للمزيد يمكنك قراءة : اساسيات اهل القران
التعليقات (16)
1   تعليق بواسطة   رضا عبد الرحمن على     في   السبت 13 سبتمبر 2008
[26792]

أهلا يا أنسة نورهان ـ موضوعك واقعي

أهلا بالكاتبة الواعدة نورهان ، بكل صراحة موضوعك واقعي ، وأنا شخصيا تعرض لمواقف كثيرة جدا مما ذكرتيه مثل التعرض للمدخنين في الأماكن العامة دون تقدير لأنهم يتعدون عىل حرية الأخرين ، وهناك أشياء أخرى مثل قيام سائق سيارة الأجرة بتشغيل أغاني ليس لها علاقة بأي ذوق ، أو قيام شاب ملتحي بفرض شريط به خطبه لأحد مشايخ دعاة السلفية ، ويفرض على جميع الركاب ان يسمعوا وعوا ، والأهم حدث معي شخصيا هو سئوال مملت منه ، زملائي في العمل لماذا لم تتزوج إلى الآن .؟ كل شهر تقريبا و الإجابة أقول ربنا يفرجها ، وإن شاء الله أنا منتظر نفس السئوال مع بداية العام الدراسي الجديد ، ولكن مع تعديل بسيط سيكون كالآتي ( هو انت لسة ماتجوزتش) .؟

عموما أشكرك يا أنسة نورهان وربنا يوفقك ، ونحن في انتظار مقالات أخرى ..  

رضا عبد الرحمن على

2   تعليق بواسطة   د.حسن أحمد عمر     في   الأحد 14 سبتمبر 2008
[26814]

موضوع جميل وهادف يا نور

إبنتى الغالية نور


موضوع جميل وممتاز وأفكار رائعة وهادفة وأرجو لك التوفيق والسداد فى مواضيع أخرى قيمة .


3   تعليق بواسطة   عثمان محمد علي     في   الإثنين 15 سبتمبر 2008
[26866]

أهلا وسهلا بالإستاذة -نورهان .

أهلا وسهلا بالكاتبة الواعدة والصديقة والحبيبة -نورهان - انا مأقدرش اتكلم عن مقالك لأنك إبنتى .ولكنى سعيد جدا جدا بك وبمقالك .وهو ينبىء بعقلية واعية متميزة .لأنه مقال ناقد .والكاتب الذى يضع تساؤلات دائما فى كتاباته ،دائما ما يكون مختلفا فى فكره عن الغالبية العظمى. وأنا أعلم أنه ليس المقال الأول لك .ولكنه الأول على موقع أهل القرآن .وهو شهادة غالية وقيمة لكى بأن تبدأى كتابة على هذا الموقع المبارك وأنت ما زلتى على أبواب الصف الثالث الإعدادى .....فأنا سعيد بك وبكتاباتك ،كما انا سعيد بتفوقك الدراسى والرياضى أيضا ...ونحن فى إنتظار مقالات آخرى حول وجهة نظرك فى نظام التعليم (ولتأخذى من مدرستك نوذجا للمقارنة بينها وبين مدرسة حكومية أخرى -من حيث عدد الطلاب وإنتظام المدرسين وطريقة الشرح -وسلوك التلاميذ -ومستوى الإدارة والإنضباط ، والدروس الخصوصية ،وهل فعلا المواد الدراسية تحتاج إلى مدرس خصوصى لفهمها ؟ أم المدرسة مع الوالدين مع مذاكرة التلميذ كافية للنجاح بتفوق ،ووعن كم المواد الدراسية وووو ) .....وشكرا مرة آخرى يا أستاذه -نورهان .


4   تعليق بواسطة   ابراهيم دادي     في   الثلاثاء 16 سبتمبر 2008
[26871]

مرحبا بالكاتبة الواعدة نورهان .

مرحبا بالكاتبة الواعدة نورهان، بنت الصديق العزيز الدكتور عثمان،

لما قرأت مقالك تذكرت المثل الذي يقول: ذاك الشبل من ذاك الأسد. وأنا أقول تلك اللبؤة من ذاك الأسد. في الحقيقة القارئ لمقالك يحس فيه البراءة والصدق والإخلص، والاعتراف بمجهودات المجاهدين في سبيل الله بالكلمة الطيبة  ابتغاء مرضاته تعالى، فعلا فقد ضحوا لذلك بأغلى ما عندهم من متاع الدنيا وزينتها طمعا فيما عند الله من النعيم المقيم والفوز العظيم.

فإلى المزيد من المقالات التي يستفيد منها القارئ، ويكتب لك بها العمل الصالح يوم الدين.

دمت موفقة في طلب العلم وفي تألق دائم.


5   تعليق بواسطة   محمد سمير     في   الأربعاء 17 سبتمبر 2008
[26923]

فرخ الوز عوام

إبنتي الغالية نورهان حفظك الله من كل سوء


ليس غريبا أن نقرأ لك هذا المقال الذي يعتبر من العيار الثقيل.فالوالد حفظه الله من الباحثين المتميزين والذي يحك أدمغتنا دائما بمقالاته ومداخلاته.


حفظك الله وجعلك ذخرا للإسلام .


مع تحياتي ودعائي لك بالتوفيق والصلاح في الدنيا والآخرة.


6   تعليق بواسطة   نورهان عثمان محمد على     في   الجمعة 19 سبتمبر 2008
[27020]

اشكركم جميعا أساتذتى.

الاستاذ رضا اشكرك كثيرا على قراءة المقال وعلى تعليقك

وصحيح حضرتك لسه ما تجوزتش ليه لغاية دلوقتى؟ عايزين ناكل (الهبر بقى)

د.حسن احمد عمراشكرك جزيل لشكر على تعليق حضرتك وانا سعيدة جدا لإعجاب حضرتك بالمقال .د.عثمان، والدى العزيز .

انا سعيدة جدا بتعليق حضرتك واتمنى ان تكون  فخور بي دائما.

الاستاذ ابراهيم دادى


شكرا جزيلا على تعليقك ،الحقيقة سعدت  كثيرا به واتمنى ان اكون مثل والدى، هذا يشرفنى كثيرا.

الاستاذ محمد سمير.

اسعدتنى بوصف حضرتك لمقالى بأنه من العيار الثقيل واشكر حضرتك جدا على التعليق وعلى الكلام الجميل
.


7   تعليق بواسطة   AMAL ( HOPE )     في   السبت 20 سبتمبر 2008
[27026]

لا يا ابنتي العزيزة !!!

 صديقتي الصغيرة الشابة الصغيرة ذات الاربع او الخمس عشر ربيعا , لك محبتي


قضيت وقتا جميلا و مبتسمة طول الوقت وانا اقرأ مقالتك لاني بصراحة لاول مرة اقرأ لانسانة بسنك واندهشت لكمية الافكار الجميلة والكبيرة التي يحملها رأسك الصغير والتي تخلو منها الرؤوس الكبيرة (ههههه هذه استعرتها من الوالد يا نور ).

واعجبتني الفقرة التالية :وكمان مبقاش فى حاجة اسمها احترام للاديان ابدا-- ومبقاش فى احترام لاراء الاخرين ولا بقي فى احترام لانه وارد جدا ان اذواقنا واراءنا وسلوكنا وعاداتنا تختلف .ياريت ناخد الناس زى ما هى. منحاولش نفرض رأينا عليهم . لان يا عزيزتي نور هناك الكثير من الرؤوس الكبيرة التي تنكر هذه الحقيقة وتخفي رأسها في التراب والرمل كما تفعل النعامة , ربنا يحميك . نرجع لعنوان التعليق ولماذا قلت ذلك.


ياعزيزتي . أعدت قراءة الحادثة التي حصلت معك في عيادة ماما مرتين ووجدت فيها شيئا ينقصك وهذا ناتج عن صغر سنك وقلة خبرتك في الحياة. صديقتي الصغيرة , هناك مقولة تقول , الزبون دائما على حق , وهذا ما يقوله اصحاب الخبرة الناجحين . نرجع للحادثة , زبائنكم في العيادة كلهم ضيوف مرضى والا ما رأيتهم , هل تعتقدين بأن السيدة التي قفلت التلفزيون كانت الوحيدة التي كانت غير مرتاحة لصوته, بالطبع لاولكن كانت أجرأالحضور , المريضة الجالسة تنتظر دورها للفحص هل تتخيلي ما يدور في رأسها وفي كم شارع وزقاق يلف. يا عزيزتي , أنا صراحتي شديدة وتتعبني احيانا ولكن وانا اتابعك واتابع تصرفك,( أولا لا اعرف هل تعملين كسكرتيرة لماما ام لا لنفرض هذا), يضرب جرس موبايلك ,تتركين الغرفة لتردي على الهاتف حتى لا يسمعك الفضوليون وهذا من حقك , ترجعين, تنتبهي ان التلفزيون لا يشتغل , وهنا النقطة المهمة جدا, كيف تصرفت يا عزيزتي؟ لنتخيل , وقفت للحظات وقفة استنكار وأنت تدورين بنظرك على المريضات ويجوز بعضهن لم ينتبهن لدخولك , واتخيلك تقولين بعيونك من المجرمة التي تجرأت وفعلت هذه الفعلة الشنعاء ؟؟ , وكما ذكرت سابقا فالسيدة كانت جريئة اصلا, وردت عليك أنا , أنا أصلي مش قادرة أسمع حاجة. هل ادركت كلامها يا عزيزتي , لم تقصد البرنامج بالذات ولكن هي مش قادرة تسمع حاجة . ارجو ان يكون قد وصلك ما اردت توصيله . واخيرا , أقول أفكارك رائعة وأنت في هذا العمر ونصيحتي لك يا عزيزتي لو عجبك ان تتقبليها ام لا .ابتسمي دائما لهم وتذكري دائما الزبون دائما على حق وبصراحة لو كنت مكانك كنت سابتسم لهم واعتذرت ليس منها فقط ولكن من الاخريات ايضا لو ان صوت التلفاز ازعجهم وبصراحة يا نور , المريضة لا تأتي لسماع التلفزيون , وإذا كان لا بد منه فيجب ان يكون بصوت منخفض جدا , دعيهم يشاهدوا ولكن لا ان يسمعوا فالمريض يحتاج لراحة لا لسماع برنامج كله ضوضاء ويثير الاعصاب فما بالك وهن مريضات , حفظك الله ورعاك .

ودمت بألف خير يا صديقتي الصغيرة

خالتك


أمل



الاخ الفاضل عثمان , اشلونك؟ واستعرت ههههه من حضرتك لحاجتي لها, والاهم أهنئك على إنك أب لفتاة بهذه الافكار الرائعة واسمها الملكة نورهان , ألم تكن نورهان ملكة لمصر ؟؟ لست متأكدة.دمت بخير.


8   تعليق بواسطة   محمد البرقاوي     في   السبت 20 سبتمبر 2008
[27027]

مرض العصر أم موضة العصر

السلام عليكم.


مرحبا بأختي الكريمة نورهان عثمان محمد علي في موقعنا المبارك أهل القرآن الذي احتضننا و مازال يحتضن معشر الشباب دائما. بصراحة إن موضوع التدخل فيما يعني قد فات حدوده كثيرا في هذا العصر الذي يركض أهله وراء كل أمر بديهي تافه لا يستحق مجرد جزء بالمائة من الثانية لتفكر فيه. و لكن البديهيات و التدخل فيما يعني أصبحا اليوم شغل من لا شغل له هذه الأيام خاصة و أن أوقات فراغ الناس قد كثرت و عوض ملء هذا الفراغ بالقراءة و العمل الجاد للنهوض بهذه الأمة النائمة فإننا نجد نوادي و صالونات و مقاهي تتجمع فيها الناس من كل حدب و صوب ليتدخلوا فيما لا يعنيهم و ليتساءلوا لم طلق فلان علانة و لم رسب فلان في الإمتحان و لم لم تتزوج فلانة بعد و ؟؟؟ و لعل تحليلهم المنطقي البائس يكون بأن هؤلاء قد أغضبوا الله تعالى يوما و ها هو الله عز و جل بدأ ينتقم منهم الآن. بصراحة أخرى إن كان التدخل في خصوصيات الناس هو مرض العصر فنسأل الله تعالى أن يعيذنا منه و أن يشفي أهله منه كذلك، و إن كانت هذه الآفة هي مما يسمى بموضة العصر مثل تلفزيون الواقع و جرائد صيد الفضائح فنسأل الله تعالى أن يرفع عنا ذلك البلاء أو الموضة لتذهب بدون رجعة. شكرا مرة أخرى للآنسة الكريمة نورهان على مقالتها الجميلة و بخصوص التدخل فيما لا يعني أسألها لم لا تنضمين لفرقة شباب البحث القرآني؟ هههههههههههههههههههههههههه. تحياتي للجميع.


9   تعليق بواسطة   نورهان عثمان محمد على     في   السبت 20 سبتمبر 2008
[27034]

شكرا جزيلا

AMAL ( HOPE )-الأستاذة الكريمة


الحقيقة والله رد حضرتك اسعدنى جدا لانى كان نفسي  اى حد من حضراتكم ينتقدنى حتى  استفيد من هذا النقد واكتشفت ان حضرتك عندك حق انا كنت اقصد انها كان يجب ان تستأذن اولا فقط ,لكن اريد ان اصحح معلومة انا لست السكرتيرة ولكن كنت منتظرة والدتى


اشكر حضرتك جزيل الشكر على النصيحة والاهتمام



الاستاذ محمد البرقاوى


شكرا على تعليق حضرتك جدا


بخصوص التدخل فيما لا يعني أسألها لم لا تنضمين لفرقة شباب لبحث القرآني؟


 لاننى لا اعتقد ان لدى  القدرة حاليا على البحث  القرانى ولازلت بتعلم من والدى  ومن  جدى الدكتور احمد  صبحى ومن حضراتكم


واعتقد ايضا اننى لا استطيع منافستكم طبعا يعنى


 


10   تعليق بواسطة   AMAL ( HOPE )     في   السبت 20 سبتمبر 2008
[27035]

اهلا يا نورهان

 صدفة جيدة ان اكون في الموقع واجد ردك .


لا زلت عند رأيي , هل تدرين بأن المريضة احق منك في الجلوس في غرفة الانتظار والتي جهزتها الدكتورة للمريضات وفتحت العيادة من أجلهن وبغيابهن ستقفل الدكتورة عيادتها , وأنا معك لو كانت ضيفة في بيتك ولكنك في هذه الحالة فأنت الضيفة عندها , ستدركين هذا الشئ عندما تكبري وتدخلي معترك الحياة , والزبون دائما على حق يا نور.


دمت بخير


أمل


11   تعليق بواسطة   عثمان محمد علي     في   السبت 20 سبتمبر 2008
[27036]

أهلا - أستاذه - أمل -

أهلا استاذه - أمل - اضم سعادتى إلى سعادة نورهان -بتعقيب حضرتك ،لأنه يمثل الصوت النسائى ،ولأنه جاء بالثناء مع النقد البناء ، وما أسعدنى أكثر هوتقبل -نورهان -لهذا النقد بكل سعادة وهى ما زالت فى هذا السن الذى يعتبر تقريبا (بداية التمرد والتغيير فى عمر الإنسان ) .بل ومطالبتها بمزيد من النقد لتتعلم منه . ....أما ما أفهمه عن نورهان انها لم ترفض فكرة إطفاء التليفزيون فى حد ذاتها ،ولكنها لم تتصور ان تقوم سيدة بإطفائه دون الإستئذان من الجميع وليس من نورهان . واشكرك على نصيحتك لها بأن تعى أن الأرزاق مركبة ،فلولا المرضى ما كان دخل الدكتورة المالى .وهكذا فالكون كله(بما فيه من أرزاق) مركب على أسباب ومسببات......وعلى هامش الموضوع  كدردشه ::: هناك ثقافة سائدة عند بعض الناس أنهم لو دخلوا عيادة طبيه ولم يجدوا بها تليفزيون او مجلات أو اشياء تروح عنهم اثناء إنتظارهم ربما لن يعودوا إليها مرة أخرى .بل بعضهم يرفض أن يكون صوت التلفزيون منخفضا ،فهو أو هى  تريد صوته عاليا كما تعودت عليه فى منزلها او منزله .فلذلك عادة ما تترك سكرتيرة العيادة هذا الأمر للزائرين والزائرات لكى لا تغضب أحد .....(ودى بس دردشة على الماشى عن ثقافة بعض الناس داخل العيادات الطبية ) .....وشكرا مرة آحرى .وتفضلى معانا الفطار فنحن على مقربة من وقت  مدفع الإفطار  .


12   تعليق بواسطة   AMAL ( HOPE )     في   السبت 20 سبتمبر 2008
[27037]

الاخ الفاضل عثمان محمد علي , شكرا جزيلا

وافطارا شهيا ,


وقد ذكرتني بالقهوة  , سأذهب لاعمل لي كوب كبير ولو ان الوقت متأخر جدا ولكن لازلنا في الويك اند .


مرة أخرى صياما مقبولا وافطارا  شهيا للجميع .


دمت بألف خير ,


أمل


13   تعليق بواسطة   آية محمد     في   الأحد 05 اكتوبر 2008
[27702]

رائع يا نورهان

أنا صار لي فترة لا أقرأ شيئا ولا أتابع شيئا ثم فكرت في المرور على الموقع المفضل لمشاهدة الجديد وأول ما شدني وأول ما قرأت هو موضوعك اللطيف والمكتوب بديباجة شبابية خفيفة.


لو أعتاد الناس سماع كلمة "وانت مالك" أو "خليك في حالك" لما تعودوا الرزالة والسخافة في السؤال والتدخل فيما لا يعنيهم. ولكن للأسف ثقافتنا الاجتماعية يعلوها الشوائب والأمراض النفسية والعقلية التي جعلت من الشاذ طبيعي ومن الطبيعي شاذ.



تعودي أن تخدي حقك بالقوة واللين في نفس الوقت وان تحافظي على حقك بالقوة واللين ايضا وصدقيني لن تشعري بعدها بمضايقة الفاضين والعاطلين وإللي مش لاقيين ليهم شغلانة.


لقد ممرنا جميعا وأنا من بينهم بكل ما وصفتيه ولكن هناك من يخجل وهناك من يرد بقوة وأنا شخصيا أفضل الرد بالقوة على من يسمح لنفسه بالتبجح على الآخرين، فلا خجل مع من لا يقدر الخجل ولا يعرفه.... مش كده ولا إيه  :)



وتحياتي لكي ولوالدتك ووالدك الكرام


آية


 


 


 


14   تعليق بواسطة   نورهان عثمان محمد على     في   الإثنين 06 اكتوبر 2008
[27788]

شكرا لتعليق حضرتك

انا سعيدة جدا لتعليق حضرتك  ولاعجابك بالمقال الاول وبحترم رأى  حضرتك جدا لان فعلا قليل الذوق لا يستحق الا الرد عليه بالقوة ولا يستحق الا  عدم  احترامه وانا اتمنى ان كل العادات السيئة تمحى تماما من شخصية المصري لانى مقتنعة تماما  ان المصري هو احسن شخصية فى العالم مهما حصل
واشكر حضرتك مرة اخرى على التعليق

15   تعليق بواسطة   نورهان عثمان محمد على     في   الإثنين 02 فبراير 2009
[33760]

شكرا جزيلا

اولا شكرا لتعليق حضرتك على المقال

ثانيا هناك الكثير من ابناء جيلي مثلى فى الاهتمام بقواعد اللغة العربية التى احترمها كثيرا واحبها رغم انى ادرس غالبية موادى باللغة الانجليزية ولكنى اشعر بالانتماء لها

ولا احب ان ادخل فى احاديثى لغة غيرها فهى لغة دينى ووطنى مصــــر

ولكن يجب ان نعطى اعذاراً للكتاب الذين ينسون تلك القواعد وذلك لبعدهم عن دراسة اللغة العربية منذ زمن بعيد

جزيل الشكر وعميق الاحترام لاهتمام حضرتك


16   تعليق بواسطة   محمد سعيد     في   الأربعاء 19 اكتوبر 2011
[60934]

نورهان

بجد خاليك فى حاللك كلمة بنسمة كتير عندما يوجد شخص ما يتدخل فى اى موضوع شخص لاى انسان

فالرد الوحيد هو خاليك فى حااااااااااااااالك .......مش تغشل باللك............ مالكش دعوة .........انا حر

شكرا على هذا المقال وفى النهاية .... 

ممكن اعرف عنوان الصفحة  الشخصية بتاعتك يا نورهان على الفيس بوك   


ولكى جزيل الشكر  


 


أضف تعليق
لا بد من تسجيل الدخول اولا قبل التعليق
تاريخ الانضمام : 2006-08-26
مقالات منشورة : 5
اجمالي القراءات : 46,445
تعليقات له : 15
تعليقات عليه : 49
بلد الميلاد : Egypt
بلد الاقامة : Egypt