بسم الله الرحمن الرحيم .

مبروك التنحى يا رجالة .

مبرووووووووووووك لمصر .مبروك لكل المصريين على تنحى مبارك وتخليه عن حكم مصر ،  وانا مبسوطة قوى  و اكيد كل المصريين مبسوطين وفرحانين علشان خلاص الظلم و القهر خلاص خلص.

وأنا بأقول لكل الشهداء الذين ضحوا بأنفسهم من أجل مصر ودماؤكم فى رقبتنا ،وطلبكم تحقق والحمد لله . . و انا  اعمل لكم و كل الشعب يعمل لكم  تعظيم سلام ، دى اقل حاجة نعملها لكم يا شهداء مصر العظام .

بأقول لكل الناس اللى نزلوا للتظاهر انتم شعب جدع و مش بيخاف  و برافوعليكم ، والله برافو عليكم .   ولو كنتم  استنيتم  عليه تانى كانت مصر ضاعت إلى الأبد . و كل المصريين اكيد كانوا خايفين من أن يمسك  جمال مبارك الحكم بعد مبارك و الحمد لله دة محصلش علشان الشعب سيطر على كل هذا وطرده بره قصر الرئاسة . وهذا انجاز ان الشعب المصرى يُخرج الريس من هذه البلد مهدد من الجيش ومن الناس . و هو لازم يعاقب على كل اللى هو عمله فى مصر،  و السرقات اللى سرقها  و غليان الاسعار و كل حاجة وحشه عملها فى مصر والمصريين  لازم يعاقبوه عليها.

 و ممنوع حد  يخاف تانى علشان البلد دى بتاعتنا مش بتاعت حد تانى. دى مصر ام الدنيا و هتفضل ام الدنيا و محدش هيعرف يهز اى حاجة فى  مصر تانى علشان مصر مابقتش لعبة لأى رئيس يمسكها . مش لما حد يمسك بلدنا  يبقى خلاص احنا استغنيناعن البلد،  لا والف لا.

مبارك ماكنش عايز الناس تتعلم ليه ؟؟او اى خبير يفضل فى  البلد ليه ؟؟علشان الناس متعرفش اللى  بيحصل فى مصر على طول بس خلاص مافيش خبير او اى واحد شاطر فى البلد دى هيمشى برة ،وكل العلماء اللى برة حيرجعوا لها تانى ، ونبنيها كلنا مرة تانية ونخليها أحسن بلد فى العالم .

مبارك و كل اللى كانوا معاه كانوا عاملين قانون الطوارئ ليه؟؟  علشان يحموا أنفسهم و لو ماكنش فى قانون طوارئ كانوا انكشفوا و راحوا فى داهية من زمان . وإستخدموه فى سجن وتعذيب وقتل الناس دون أى ذنب . كانوا عايزين البلد تخرب وينهبوا كل خيراتها . ولو فى حد كشف حاجة من جرائمهم ونشرها على اليوتوب والإنترنت ،يبحثوا عنه ويعتقلوه ويشردوا أهله ،مثل ما عملوه فى مجموعة خالد سعيد ، وما عملوه مع كل اللى نشر حاجه ضدهم على الإنترنت .

 الحمد لله على النصر الكبير ،ومبرووووك لمصر . وحسبى الله ونعم الوكيل فى حسنى مبارك واللى كانوا معاه .