وجهة نظر فى صورة شعرية:
طبطب على كتف زمانك

د.حسن أحمد عمر في الخميس 07 يوليو 2011


طبطب على كتف زمانك

علشان عيالك وعشانك

 

واصبر على غدر الخلان

وانسى  منابع أحزانك

 

واعمل ليوم الحشر حساب

الدنيا مش كل آمالك

 

وامسح دموعك يا مسكين

غطى حبايبك بحنانك

 

لا ف يوم يغرك مال ولا جاه

إسعى وربك حيبارك

 

واطلب مزيد العلم تنول

دا العلم نورك وكمالك

 

وامسح على راس الأيتام

واعطف على كل جيرانك

 

اياك تجيب سيرة إنسان

إحفظ كلامك ولسانك

 

متع عينيك بآيات الله

وقول يا ربى سبحانك

 

دا كمال حياتك فى الإيمان

وجمال حياتك فى جمالك

 

إياك تعادى الناس وتكون

العوبة فى ايدين شيطانك

 

يضحك عليك وتعيش مكروه

ما بين صحابك وجيرانك

 

خليك كدة طيب على طول

واوعى تغير فى صفاتك

 

والطيبة معناها الرضوان

والصبرعلى مُر زمانك

 

والحب      والتسليم لله

تضمن سلامك وأمانك

 

وتخلى آيات الرحمن

نورك وبهجة ايامك

 

يا مصر يا أم الصابرين

يا بهية يام طريق سالك

 

ياما صبرتى على الظالمين

وما همكيش اللى جرالك

 

نفسى تكون الايد فى الايد

وتعيشى حرة بأولادك

 

لا طائفية ولا جماعات

ولا تفرقة بين سكانك

 

كل اللى فيكى مصريين

صاينين جنوبك وشمالك

 

لا لون ولا أعراق ولادين

ولا شىء يشتت وجدانك

 

ولا دعوة لتطرف مجنون

يفك لحمك وعظامك

 

حتعيشى يا مصركبيرة

وهتهزمى كل اعدائك

 

شامخة على مر الأزمان

نيلك وأرضك ورجالك

 

يا ثورة الأبطال دومى

علشان تشوفى أحلامك

 

سرقوا غدايا وعتومى

وجوعوا كل عيالك

 

سرقوا لحافى وهدومى

والبرد ضحضح أوصالك

 

ثورة يناير يا عظيمة

يا صاحية ليلك ونهارك

 

يامشعللة كل عزيمة

القوة والحب شعارك

 

خليتى لولادك قيمة

ورفعتى راسهم بعنادك

 

يا مصر يا أم الأمجاد

مبروك على كل ولادك

 

طلع النهار ولا عدشى سهاد

والرعب غادر جدرانك

 

طلع النهار والمولى أراد

وهزمتى ضعفك وهوانك

 

طلع النهار والظلم أهه باد

والعدل بات فى أحضانك

 

طلع النهار والذل انزاح

والفرح بدد أحزانك

من ديوان الحب فى الهجير

ل حسن أحمد عمر

 

 

 

 

 

 

 

 

 

 

 

 

 

 

 

 

اجمالي القراءات 9079

للمزيد يمكنك قراءة : اساسيات اهل القران
التعليقات (2)
1   تعليق بواسطة   فتحي مرزوق     في   الجمعة 08 يوليو 2011
[58855]

أكرمك الله على هذا الشعر وهذه الكلمات الطيبة دكتور حسن.

كلمات طيبة تنم عن قلب طيب عامر بالإيمان أكرمك الله دكتور حسن أحمد عمر عليها.


وليت من يغالي في أقواله ويتطرف في أفعاله ياخذ من هذا الكلام الطيب قدوة له .


2   تعليق بواسطة   د.حسن أحمد عمر     في   الجمعة 08 يوليو 2011
[58861]

أكرمك الله أخى الأستاذ فتحى مرزوق

وأدعوه جل وعلا أن يسدد خطاك وأن يحقق أحلامك وأشكرك على تعليقك الطيب على قصيدتى وأحمد الله تعالى أنها حازت على إعجابك.


أضف تعليق
لا بد من تسجيل الدخول اولا قبل التعليق
تاريخ الانضمام : 2006-09-03
مقالات منشورة : 209
اجمالي القراءات : 2,816,236
تعليقات له : 1,171
تعليقات عليه : 1,054
بلد الميلاد : Egypt
بلد الاقامة : USA