من ديوان الحب فى الهجير ل حسن أحمد عمر:
أحلام كاتب مصرى

د.حسن أحمد عمر في الجمعة 08 ابريل 2011


عايش احلم بموقع
ع النت يكون مشهور
أكتب واعلق وافكر
وأغوص فى كل البحور
واتكلم بعلو صوتى
وتكون حياتى نور


ومخافش من أى واحد
يعمل علىّ حصار
يفرض علىّ كلامه
ما هو دكتاتور جبار
واللى يخالف نظامه
يصبح من الكفار


يا مصر ياطيبة
يا نبع كل جمال
يا غالية يا حنينة
يا ام الرجال ابطال
حبيت انا تربتك
وعشقت وطنيتك
وشربت من ميتك
يا صابرة على كل حال


يا حلوة يا سمرة
ياام البيوت عامرة
يا ام العيون ساهرة
يا ما عذابك طال


نفسى أقول واحكى
عن كل شىء واشكى
ليه يكتموا الأفكار
ليه يكبتوا الآراء
يرضيكى يا حرة
إبنك يعيش مكبوت ؟
لا يقول ولا يتكلم
ولا ينسمع له صوت ؟
مع إنه متعلم
وكمان بيحبك موت
لكن بيتألم
من قسوة الجبروت


ده حتى بيتهته
صبح اللسان مربوط
فى كل متر يابلدى
يقابلنى بعبع يم
اللى يقول له بم
ياكله فى بطنه عم
سيبونا يا عالم
على بعضنا نتلم
يمكن مع الصحبة
جرح العليل يتلم


ونرجّع الإنسان
قصدى اللى كان إنسان
يمكن يفكر يهم
ينهض يقاوح يكافح
ويعوض اللى راح
دا المصرى أصل الحضارة
سيبوه يداوى الجراح
ويبدل الكبت كلمة
بدل العداوة سماح


ويغير الفعل (يكره)
إلى (يحب) النجاح
ويغير الفعل (يحقد)
إلى صلاح وفلاح
ويغير الفعل (يقتل)
إلى ( يعيش) مرتاح


ويغير الفعل (يشتم)
إلى لسان صداح
ويغير الفعل (فرق)
إلى ( يلم) الجراح
ويغير الفعل (يقهر)
إلى احتضان وسماح


نفسى الاقى موقع
ع النت يكون مشهور
أكتب واعلق وافكر
واغوص فى كل البحور


لا حد يقول لى بخ
ولا حد يقول لى هس
ولا حد يقول لى نخ
ولا حد يقول لى بس


المصرى يا جدعان
عمره ما يبقى جبان
هو صحيح غلبان
ويحب صاحبه كمان
لكن فى الجد راجل
زى الجبل رسيان


ويعشق الحرية
زى الهوا والمية
ويحب كل الناس
قلبه ملان إحساس
ويحب يعيش فى أمان

 

اجمالي القراءات 5795

للمزيد يمكنك قراءة : اساسيات اهل القران
التعليقات (4)
1   تعليق بواسطة   محمد عبد الحليم     في   السبت 09 ابريل 2011
[57132]


كلمات قصيره تحتوى على معانى عميقة وأحاسيس جميله وتصوير رائع جزاك الله خيرا

 


2   تعليق بواسطة   د.حسن أحمد عمر     في   السبت 09 ابريل 2011
[57135]

عزيزى محمد عبد الحليم

تحية طيبة


وأشكرك على مرورك وتعليقك الرقيق وأتمنى لك مستقبلاً زاهراً .


3   تعليق بواسطة   ميرفت عبدالله     في   الأحد 10 ابريل 2011
[57145]

كلنا نحلم . ولكن

 كلنا نحلم معك د. حسن بهذه الأحلام المشروعة ومع ذلك هم لم يتركوا لنا الحرية حتى في أن نروي  الأحلام ونتمنى معها بعض أمنيات  .


ولكن واجبنا  أن لا نعطيهم الفرصة مرة أخرى لكي يعودوا كما كانوا عليه فيجب الوقوف لهم ومحاربة الفساد بجميع أشكاله .


وأن ننشر ثقافة الحرية والكرامة  وعدم الخنوع  وعدم السكوت على الظلم على الشبكة العنكبوتية لكي نزرع في أولادنا قيم ومبادئ  قيمة سوف ترتقي بهم وبأخلاقهم  . 


4   تعليق بواسطة   د.حسن أحمد عمر     في   الأحد 10 ابريل 2011
[57153]

بدون ولكن

الأستاذة المحترمة ميرفت عبد الله بعد التحية الكريمة أؤكد لكم أن الحلم أصبح حقيقة بدون ولكن .. رغم أنف أعداء الثورة المباركة فقد استيقظت مصر واستيقظ المصرى ولم يعد بوسع اللصوص أعداء الحرية واعداء الحب وأعداء السلام أن يسرقوا مقدراتنا أو يعتدوا على حرياتنا او يهضموا حقنا فى حياة حرة كريمة . تحية كبيرة لشخصكم الكريم .


أضف تعليق
لا بد من تسجيل الدخول اولا قبل التعليق
تاريخ الانضمام : 2006-09-03
مقالات منشورة : 209
اجمالي القراءات : 2,575,335
تعليقات له : 1,171
تعليقات عليه : 1,054
بلد الميلاد : Egypt
بلد الاقامة : USA