تضامنا مع (علاء عبدالفتاح ) كمثال للمعتقلين المصريين دون وجه حق .( علاء فى خطر

في الخميس ١٠ - أكتوبر - ٢٠١٩ ١٢:٠٠ صباحاً

علاء عبد الفتاح تم تغميته وهو في عربية الترحيلات امام سجن شديد الحراسة ٢ بمنطقة سجون طره، علاء نزل اتفتح الباب ودخل من باب السجن الخارجي وهو متغمي فضل يتوجهة للمشي من خلال ضرب العساكر والمخبرين بالأقلام والرجلين وده لمدة دقائق، بعد كده وقف داخل ممر او ما شابه واجبروه على خلع جميع ملابسه إلا الداخلية "البوكسر" ومشي ممر طوله تقريبا ٣٠٠ متر في تشريفة تانيه من الضرب وهو مجبر كمان على النظر لأسفل " محني" وفي نص الممر وقفوا الضرب وشخص عرف نفسة لعلاء انه دكتور وسأله فيك اصابات عندك أمراض؟؟ علاء قاله انه عنده تاريخ مع الحصاوي وجسمة قابل لتجميع الحصاوي، ومحتاج مايه نضيفه، ومشي الدكتور واستمر الضرب لغاية ما دخل على حد كله بيقول له يا باشا، والباشا ده اتكلم مع علاء وقاله انه بيكره الثورة وبيكره علاء وان السجون ديه معموله علشان تعلم الأدب للي شبهك، وانت حتفضل في السجن طول عمرك وكلام بالشكل ده، وبعد كده علاء راح على الزنزانة بتاعته اهو متغمي وبيتضرب برضو، ده غير تهديد رئيس مباحث السجن لعلاء بشكل مباشر قبل ما يجي جلسة تجديد الحبس، وقال له لو كلمة عن أوضاع السجن واللي حصل اتقالت بره، مش حيكون كويس علشانك.

ده تقريبا نص كلام علاء في النيابة انهاردة، علاء في خطر واحتمال كبير يتم التنكيل به وتعذيبة بعد ما الكلاك ده يوصل لهم، يعني احتمال كبير علاء يكون بيتعذب وانت بتقرأ الكلام ده.
وكمان أسرة علاء قرروا يباتوا امام السجن خوفاً منهم على حياة علاء بعد فضح القائمين على إدارة سجن شديد ٢

علاء بيخوض معركة للحفاظ على كرامتة واحتمال يكون ثمنها غالي،خليك صوت علاء وافضح انتهاكات سجن شديد٢

#علاء_في_خطر

 

اجمالي القراءات 1620