كتب –  خليل أبو شادي :

في لجنة مدرسة البنات الثانوية بشبرا الخيمة ثان، الهدوء سيد الموقف في التاسعة والربع، رغم الطوابير الطويلة جداً التي تملأ “حوش” المدرسة، إلا أن الجميع يصطفون في هدوء وترقب، وقليل من أصحاب اللحى يتناقشون خارج الصفوف، أحدهم قال “لو الأقباط عايزين حزب يعملوا حزب، وإحنا نعمل حزب ونشوف مين الأغلبية، مش هيه دي الديمقراطية”، وفي مجموعة صغيرة أخرى، سأل أحد الأشخاص”ليه نقول نعم؟”، فرد رجل ملتح “علشان نحافظ ع المادة الثانية، لأن فلول النظام السابق عايزين يلغوها”

-        بس أنا عرفت إن الحزب الوطني أعلن تأييده للتعديلات.

-        لأ ما أعلنش، وكمان البرادعي قال لأ.

-        لكن البرادعي مش من النظام السابق.

-        العلمانيين والليبراليين قالوا لأ، علشان مش عايزين المادة الثانية، ومش عايزين الاستقرار، وعايزين حال البلد يفضل واقف كده.

جاء رجل أبيض سمين حليق الذقن وقال مشيراً إلى عدد من النساء غير المحجبات يقفن في طابور النساء :”شايفين كل العريانين دول مسيحيين جايين يقولوا لأ للمادة الثانية”.