بسم الله الرحمن الرحيم

انا كنت فى مدرسة إبتدائية خاصة فى مصر ، وكانت ممتازة وجميلة . ولكن عندما حضرت إلى كندا وذهبت إلى مدرستى الجديدة وجدت الأجمل والأحسن والفروق التالية .

سهولة الإلتحاق بالمدرسة ،ولا تحتاج أكثر من إتصال تليفونى بالإدارة المدرسية ،فأعطونا عنوان وتليفون مدرستى الجديدة ، فأتصلنا بهم بالتليفون وحددوا موعد لتقديم الأوراق ، وذهبنا إليهم فى الميعاد ،ووجدنا إن الأوراق المطلوبة بسيطة جدا وهى إثبات تاريخ الميلاد وإثبات إقامة فى كندا فقط .وسجلنا على طول فى أقل من خمس دقائق ، ولم يجدوا لى مكان عندهم لأن عدد الفصول مكتمل ،ولكن إتصلوا بمدارس أخرى كى يجدوا  لى مكان ،وبعد يومين وجدوا لى مكان فى مدرسة ثانية  وذهبت ثانى يوم على  فصلى على طول بدون مشاكل وكأنى كنت معاهم من أول السنة .

وفى أول يوم أعطونى دولاب وشماعة  لأضع حاجاتى فيه و أجلسونى بجوار زميلة جزائرية علشان تترجم لى اللى أنا مش عارفاه . وفى الفصل ممنوع أى جاكت أو طاقية أو كاب علشان نكون كلنا زى بعض .والحصة –عبارة  عن ساعة وربع والدرس بسيط ، والمدام  بتكرره أكتر من مرة وبعد كده بتسألنا فيه ونشرحه لبعض زى ما نكون مدرسين لما بنطلع فاهمينه يعنى فاهمينه وحافظينه كمان . واليوم الدراسى عبارة عن أربع حصص فقط 2 فرنساوى –وواحدة رياضيات –وواحده – العاب او موسيقى او رسم وفن ، وفى ربع ساعة قراءة من اى كتاب نختاره  من اللى موجودين فى مكتبة الفصل .

والفسحة  ساعة وربع كمان  بناكل فيها الغداء مع الوجبة اللى المدرسة بتقدمها لنا فى مطعم المدرسة . وفى آخر اليوم بنروح فى أتوبيس المدرسة ، وهو أتوبيس خاص بالمدرسة ومجانى وبيوصل كل من يبعد سكنه عن المدرسة ب 1كم او أكثر .ومواعيده مظبوطة . يعنى الصبح بيجى عند العمارة اللى ساكنين فيها 7ونصف – يعنى 7ونصف .ولما بيقف علشان يركب حد أو ينزل حد لازم كل العربيات اللى وراه تقف ومستحيل تعدى منه وهو واقف ، وأول ما يقف يفتح علامات (قف) من الجنب اليمين والشمال – فكل العربيات تقف كأنها واقفه فى إشارة مرور حمراء .ويوجد على تقاطعات الشوارع المحيطة بالمدرسة مشرفين مرور يقفون فى الصبح وعند خروجنا من المدرسة لكى يوقفوا العربيات عند تعديات التلاميذ من الشوارع وكل مشرف لابس لبس خاص ومعه لوحة مكتوب عليه قف ،وبيوقف الشارع علشان نعدى حتى لو كانت الإشارة خضراء .ولازم العربيات تقف ،ولو فى عربية ما وقفتش يكتب لها مخالفة ب 152 دولار على طول ،ده غير إن سرعة السيارات القصوى بجوار المدارس والمستشفيات لا تتجاوز 30كم فى الساعة  . وفى حصة الألعاب –بنروح صالة الألعاب وفيها كل حاجة  ،اللى عايزة تلعب كورة قدم أو سلة او طايره أو هوكى  أو جرى أو أى حاجة .وبعد كده فى حصة مخصوصة للسباحة .يعنى انا وزملائى لا نرهق ولا نصدع ولا نتعب من الدروس ولا من المدرسة  - الدروس خفيفة والواجب خفيف وبسيط وسهل وتقريبا بنكون حافظينه وفاهمينه من الحصة – واللعب زى ما أحنا عايزين .وطبعا موجود معنا مدرسة الألعاب  تفهمنا وتشرح لنا إزاى نلعب اللعبة اللى إختارناها ..وفى حصة الموسيقى  بيعلمونا  دروس الموسيقى على البيانو ..وفى وقت القراءة بنقرأ فى هدوء وعلى صوت موسيقى هادئة  بتخلى الواحد عايز ينام .. وبيطلبوا مننا فى الرسم نرسم حاجات كتيرة ونعمل أنشطة كتيرة .. وبيطلبوا مننا نعمل أبحاث  عن الحيوانات او الطيور ونكتب عنها موضوع ،وأنا اخترت الحمام كرمز للسلام لأكتب عنه

.ولكن فى مصر المدرسة كانت جميلة ونظيفة  لكن مش زى مدرسة كندا ، ووقت الحصة لم يكن كاف للدرس زى مدرسة كندا ، والمدرسين فى مصر شاطرين ،لكن مظلومين والوقت لا يسعفهم ليشرحوا كويس ، وفيهم كثير عايز التلاميذ تاخد دروس خصوصية عنده أو فى مجموعة المدرسة ، وهذا غير موجود فى مدرستى الجديدة ، فالمُعلمة بتطلب منى أن اذهب لها أثناء الفسحة بعد ما اخلص أكل علشان تشرح لى اللى فاتنى  قبل كده وببلاش .والمدرسين بيضحكوا وبيشرحوا ببساطة وبالراحة لكن فى مصر كانوا متنرفزين  وزعلانين .والحصص كتير وراء بعضها ..وطبعا الطريق للمدرسة فى مصر كان دائما زحمة وضوضاء فظيعة والعربيات تخش على بعضها ويشتموا بعض ،ولا يحترموا المرور ولا يحترموا الطريق ،وكل عربية ماشية بمزاجها ،وبدل ما ناخد الطريق فى عشر دقائق ناخده فى ساعة ، والسواقين لما يشوفوا واحدة ست هى اللى سايقة العربية زى ماما كده ،يقرفوها وما يمشوش فى نظام لا ،فيهم سواقين زى الزفت زى بتوع الميكروباس يمشى  بسرعة فظيعة ويكسر العربيات اللى جنبه ولا ينظر فى المرايات ولا فى أى حاجة ...لكن هنا فى كندا كله فى طريقه وبنظام ولا فرق بين اللى سائق راجل ولا ست ولا ولد ولا بنت ،كله بيحترم كله ،وكله بيحترم الإشارات ،وكله بيحترم علامات الوقوف ،وطبعا مفيش فى حد بيعدى الشارع إلا من المكان اللى محدد له عند الإشارة وفى الوقت اللى تكون الإشارة مفتوحة للناس ،يعنى الإشارة بتفتح للناس تعدى الأول ،وممنوع العربيات تعدى إلا بعد ما الناس تعدى ،وبعد كده تقفل للناس وتفتح للعربيات وممنوع الناس تعدى حتى لو الإشارة خضراء طالما قفلت لهم ولو كان فى حد لسه بيعدى لازم العربيات كلها تقف لغاية ما يعدى مش علشان أتاخر أو غلط  تدوسه وتعدى لالالا  .. لكن فى مصر ، الناس بتعدى من أى مكان فى الشارع ولا تحترم الطريق ولاأى حاجة ولا العربيات كمان بتحترم الناس اللى ماشية على رجلها ،يعنى كله مش بيحترم كله ،وكله ده بياخر الناس عن شغلها ،والتلاميذ عن مدارسها ،وتكلف أصحاب العربيات فلوس كتير فى البنزين لأن المشوار اللى بياخد عشرة دقائق بياخد ساعة وعشرة دقائق ..وطبعا مفيش حد مخصوص   زى المرور  بيحافظ على الأطفال وهم بيعدوا الشوارع اللى بجوار المدارس وبيقفل لهم الشارع زى كندا ..

واتمنى أن يتمتع أصحابى وزملائى  فى المدارس المصرية وياخدوا حصص بسيطة  ودروس خفيفة  مثل  مدارس كندا ...