كتب: شريف عاطف سليمان

أرسل فلاح من إحدي قري الدقهلية، رسالة إلي الرئيس عبدالفتاح السيسي، كشف فيها عن مدي معاناة الفلاحين بسبب عدم بيع وتوزيع محاصيلهم، ومغالاة الوحدات المحلية في أسعار المياه والكهرباء عند إقدام أحد الفلاحين علي بناء بيت له، مطالباً الدولة بتوفير “دولة العدل” بدلاً من امتلاك “الحيتان ل 10 آلا و 15 ألف فدان” وذلك علي حد قوله.

وقال الفلاح “احنا بنورد قطن بقالنا 55 يوم مجلناش جنيه، وروحنا مديرية الزراعة بتاعة الدقهلية والمديرية بتاعة مركز أجا واتصلنا علي مكتب الوزير في مصر، احنا فئة شحاتين في مصر، اللي هي الفلاحين، لما الحكومة تاخد فلوسنا منعرفش نجيب كيماوي نصرف علي أراضينا ومنعرفش نصرف علي الأجاير وعيالنا، والحكومة تشتغل بالفلوس براحتهم وبعدين مندوب الجمعية بتاع سنجيد يروح يديهم 100 ألف يدوه لواحد أو اتنين”.

وتابع “كل ما نكلم جهة مختصة، يقولولنا هنشوف.. هل دي عدالة، عايزين السيسي يتكلم علي التليفزيون ويقول هو عمل ايه للفلاح المصري، واحنا انتخبناه، قول بقي، انا فتحت التصدير للرز وروح للمكان الفولاني”.

وأوضح “القطن انضرب سعره وانضرب بذره، ومعدش اشراف ولا عاد زراعة ولا مهندسين زراعيين، يجو يقولنا علي كل حاجة، القمح الوحيد اللي ماشي عشان الناس جعانة ومفتوح بابه وبنروح نوديه وبنقبض فلوسه، فين العدالة بتاعة الدولة.. الحيتان بتاعة الدولة كل واحد معاه 10 آلاف و15 ألف فدان، احنا غلابة نروح فين، احنا بنزرع في 40 جنيه مش فايض جنيه، احنا بنقطع الدرة بنهرسه للبهايم ومش بنعرف نبيعه”.

وأضاف “الأراضي اللي بتستصلح، يعرفونا لينا نصيب فيها وللا لأ، كل الأراضي دي والشحاتين اللي زينا قاعدين فوق بعض، والوحدات المحلية باظت.. واللي فينا بيقدر يبني بيته، الوحدة المحلية تفرض عليه فلوس بالشئ الفولاني للمياه والكهرباء نجيب منين، ايه اللي انتو بتدهولنا عشان نغرم الفلوس دي كلها، وايه الوظايف اللي احنا بنشتغلها عشان ندفع ده كله”.

واختتم الفلاح بكلماتٍ مؤثرة، طالب فيها السلطة بترسيخ دولة العدل أو إعدام الفلاحين الذين زادت معاناتهم في فترة حكم السيسي “دي مش عدالة، يا إما تعدمونا وتضربونا بالنار وجيبوا شعب تاني، عشان الحكام يعيشوا فيها مبسوطين”.