إضحك على تصرف مُدرس البلاغة .
حدث بالفعل .
بمناسبة صعوبة إمتحانات الثانوية العامة السنة دى . رغم أن العيال واخدين دروس فى كل مادة حتى فى إزاى يلبسوا الشرابات ههههههه
زمان سنة 78 وانا فى 2 ثانوى أزهر فى معهد أبو كبير الثانوى الأزهرى (حاكم أنا أزهرى قُح حتى النخاع ..ههههههه بس الحمد لله وعلى رأى الشيخ محمد عبده -يرحمه الله غسلت مُخى بمياة نار لغاية لما تخلصت من مناهج الأزهر فى الدين ) كُنا بندرس مادة (البلاغة ) ودى بالنسبة للأزهرية مادة  سهلة وهايفة قوى قوى دراسيا ولا يُمكن تاخد فيها دروس .وهى مادة مسئولة عن إزاى كلامك سواء أقوال أو كتابة تبقى حلوة كده ومٌنمقة وفيها حاجات غامضة ((وتخليك فذلوك حبتين فى الكلام أو الكتابة )) . المُهم كان وكيل المعهد (نائب مدير المعهد -بمفهوم التعليم العام ) مدرس لغة عربية وهو مُدرس البلاغة ، وبعد شهرين من الدراسة بدأ يطلب مننا ناخد دروس عنده فى البلاغة وإلا حيدينا صفر فى أعمال السنة وحيسقطنا فيها ويجيب لنا مُلحق وحيسقطنا فى الملحق كمان ونعيد السنة (وكان تقريبا بنص جنيه فى الشهر أو حاجة زى كده - وأنا فاكر زميل لنا كان عندهم جنينة ليمون كان بيجيب له ليمون ثمن الدرس -هههههه) . فنص الفصل تقريبا وافق ياخد دروس والباقى بيشاور نفسه .فبدأ يعمل إيه ؟؟ يدخل الفصل فى حصة البلاغة ويطلب مننا اللى بياخدوا درس يقعدوا فى صف واللى ما بيخدوش درس يقعدوا فى صف .ويبتدى يمليهم الدرس ومُلخص له ويكتبوا وراه ،وإحنا اللى ما بنخدش دروس ماسك لهم خرزانة ومانعهم من الكتابة ومن فتح الكتاب وقاعدين زى الأصنام ههههه ولو واحد إتكلم أو كتب أى كلمة يرزعه بالخرزانة على جسمه فى أى حتة تنزل عليها الخرزانة ... فا إسبوع فى 2 فى 3 العيال كلها خافت منه ومن أن يسقطهم ومن الضرب بتاعه وبدأت تاخد درس البلاغة وما عدش غيرى أنا اللى ما باخدش درس ... وأنا مستحيل حاخد درس وخاصة فى مادة زى دى (بلاغة إيه وبتاع إيه ) ده أنا لو أخدت فيها درس تبقى حديث العالم ههههههه ليه ؟؟ ده انا الأول على المعهد على طول من أولى إعدادى والمواد الأزهرية دى بنجيب فيها الدرجات النهائية وإحنا مغمضين زى ما بيقولوا هههههه .. المهم الأستاذ جه فى يوم لما لقانى أنا الوحيد اللى ما باخدش درس عنده فقال لى إنت منين يا وله (يا ولد ) ؟؟؟ فضحكت كده .وقلت له أنت مش عارفنى صحيح يا أستاذ؟؟؟ فأنا فاكر وجهه تغير وإحمر وبقى 70 لون وقال لى :: انت من طوخ القرموص (ودى قرية تبع أبو كبير -شرقية) ؟؟
فقلت له ::: لا يا أستاذ :: على فكرة انت اللى بتجيب لى نتيجة الإمتحان كُل سنة .انا من (ابو حريز ) وأنا ابن محمد أبو على الخليفة وبيتنا جنب بيت أُختك (بيت أخته كان ضهر بيتنا ) .
=
على فكرة - كان يرحمه الله خطيب الجُمعة طول عُمره - ككل مشايخ الأزهر يدعو الناس للفضيلة والإخلاص فى العمل !!!!!. لكن خطبة الجُمعة شىء ودروس البلاغة شىء آخر هههههه.
==
لكن أحسن حاجة أنه يقسم الفصل نصين ويملي الدرس وملخصه على اللى بياخدوا دروس ويضرب النص التانى لو كتب كلمة ..... طيب يا ذكى باشا ما بعد الحصة ما تخلص حننقل الدرس والملخص من زمايلنا اللى كتبوه هههههههههههه .