أخونا الكبير استولى على معظم ميراثنا من ابونا وبعدين من أمنا . ورضيت أنا واخويا باللى حصل لأننا كنا صغار . ونحمد ربنا . ربنا بارك لنا ، وبقينا أغنى من اخونا الكبير اللى عياله بينتقموا منه . اللى عمله فينا عياله بتخلصه منه فى حياة عينه . اما ما بسألش حضرتك على كده . أنا أخويا الصغير عنده سرطان ، وأيامه قربت . وعايز يكتب لى كل اللى عنده ، وإحنا شركاء فى المحل وفى البيت مع بعضنا من يوم ما انفصل عنا أخونا الكبير وخد البيت الكبير والمحل الكبير وحتى حتة الأرض كمان . المهم اخويا عايز يكتب لى بيع وشرا كل حاجة لأن أخونا الكبير حيورث فيه زيى زيه . وده ظلم ، يعنى ياكلنا مرتين .رأى حضرتك نتصرف إزاى لأن اخونا الكبير بطنه واسعة وما يستحقش حاجة من مال أخويا عاطف اللى اتعبنا أنا وهو فيه سوا .ياريت حضرتك ترد بسرعة .