بعيدا عن التوتر.. تبقى النكتة عن مبارك بمفعول الصاروخ
الكاتب وطن الجمعة, 11 فبراير 2011 06:22
الرئيس حسني مبارك بالطيارة قرر يرمي 100 جنيه
يفرح بها عائلة مصرية
قالت زوجته: خليهم خمسينتين وفرح عايلتين
قال ابنه: خليهم 25 وفرح أربع عوايل
قال كابتن الطيارة: يا عم أرم نفسك وفرح 70 مليون مصري.
------------ ---------
علاء مبارك شارك في من سيربح المليون ........
وصل لآخر سؤال، السؤال: من هو أكبر حرامي في مصر ؟
طلب مساعدة صديق واتصل بأخوه جمال وقاله السؤال
رد عليه أخوه: انسحب باللي كسبتوا وما تخسرش أبوك!!
------------ ---------
مبارك : عارف يا ابليس ياخويا, انا عاوز اعمل في الشعب المصري حركه تطلع من نافوخهم
أبليس : طب هات ودنك وخد الفكره دي .....وش وش وش وش
مبارك : لالا يا ابليس الفكره دي مش نافعه , عاوز حاجه أشد
أبليس : طب خد دي ........ وش وش وش وش
مبارك : لالا , برضه مش نافعه , ايه يا ابليس انت بقيت خرع كده ليه , هات بقه ودنك وانا اقولك انا نويت اعمل فيهم ايه
وش وش وش وش وش
ابليس : لا يا راجل حرام عليك
------------ ---------
واحد اتحشر في زحمة المرور فلقى واحد بيخبطله على شباك السيارة
فتح الشباك و سأله عايز ايه
قاله : الرئيس حسنى مبارك خطفوه و الفدية 5 مليون $ دولار
و لو الفدية ماتدفعتش .. الخاطفين هددوا يدلقوا عليه بنزين و يولعوا فيه
و احنا بنجمع تبرعات .. تحب تشارك ؟
الرجل سأل : " و في المتوسط الناس بتتبرع بكام"
الرجل الثاني : " من 5 الى 10 لتر بنزين .
------------ ---------
مرة سيادة الريس مد إيده في جيبه لقي 5 مليون جنيه !!
فزعل قوي وخاف وقال: إيه الفلوس دي الفلوس دي حرام؟
فسأل أحد مساعديه فدله على طريق الشيخ طنطاوي
رئيس الأزهر وقال له: اسأل الشيخ وهو يقول لك الحل .
ما كدبش خبر وجري على طنطاوي وحكا له القصة فرد:
5 مليون بس .. إيه النزاهة دي؟
دي بسيطة خالص يا ريس ما تزعلش نفسك؟
كل اللي هتعمله حتروح تمشي بالأحياء الفقيره ، كل ما تمشي 1 كيلو تتبرع بألف جنيه عن كل مليون جنيه وخلاص .
الريس راح يمشي ، وهو بيمشي قام لقي عمنا صفوت الشريف بيمشي! بنفس ال مكان فقال له : أنت بتعمل إيه هنا؟ أنت حتمشي كام؟
صفوت قاله 78 كيلو يا ريس.
الريس: يخرب بيتك؟ ده أنت خربت البلد !!
صفوت: أنت جاي علي أنا وتحاسبني؟ روح شوف علاء ابنك جايب موتوسيكل وبقاله 3 أيام بيمشي فيه
------------ ---------
كان حسني مبارك فى سرير المرض حينما أخذ يلقى بوصاياه الأخيرة لوزيره احمد نظيف :
- وصيتك الحكم من بعدى يا احمد ...
- فى رقبتى يا ريس .. كله تمام والسلطة هياخدها جمال ...
- ثم راح فى غيبوبة .. أفاق منها بعد قليل ...
- وصيتك الشعب من بعدى يا احمد ..
- ما تخافش يا ريس .. الشعب ياكل الزلط ...
- ثم راح فى غيبوبة .. أفاق منها بعد قليل ......
- احمد ...
- نعم يا ريس؟
- بس ماتنساش .. توكيل الزلط لعلاء
------------ ---------
واحد سأل المغنى سعد الصغير
..... إنت ما غنيتش للريس ليه زى الباقيين ....
سعد الصغير قاله : إزاى طبعاً غنيت !!!
قاله : غنيت إيه ؟؟؟
سعد الصغير قاله : غنيت له طبعاً " بحبك يا حمار " ...
------------ ---------
بيقولك واحد تانى لقى الفانوس السحرى ودعكه طلعله العفريت
و قالــــــه: شبيك لبيك تطلب أيه ؟
قاله الراجل : أنا عايز كوبرى بين القاهره و أسوان
العفريت قاله : دى صعبه قوى .. نقى حاجه تانيه
الراجل قاله : خلاص خلى حسنى مبارك يسيب الحكم
العفريت قاله : أنت عايز الكوبرى رايح جاى ولا رايح بس
----------- ---------
إخبرنى بصراحة يا نظيف ولا داعى للمجاملة أو النفاق .
نظيف : أمرك يا ريس
الريس : أنا الأفضل و لا عبدالناصر ؟
نظيف : انت طبعا يا ريس .. جمال مين دا اللى كان بيخاف من الروس !!
الريس : طيب أنا الأفضل ولا السادات ؟
نظيف : سادات مين دا ياريس اللى كان بيخاف من الأمريكان !!
الريس : طيب أنا الأفضل ولا عمر بن الخطاب ؟
نظيف : انت طبعا يا ريس .. عمر بن الخطاب دا كان بيخاف من ربنا . إنما انت لأ