ماجد هاشم كيلانى Ýí 2016-08-24
المقامة المسيح دجّالية ...حكالنا حنفي بن تامر وقال :
مرّة كنت نايم , على السرير وهايم , في أحلامي الورّدية , ..سمعت خبط ع الباب , قومت أجري على الباب , ومن العين السِحرية , مدّيت عيني وبصيت , بتركيز عالي لقيت , ع الباب واحد قُصيّر , جدا وضخم وصُغيّر , ف السن و وشّه أسمر , جدا مدّي على أحمر , وشعره خشن منكوش , طويل.. ووشه منفوش , وعريض ..وعنده عين واحدة , شبه الكوبري أبو عين واحدة ! , ...كان واقف ضهره محني , ومتقوّس ومتنى , زي اللى عنده الزايدة ! , قولت ف سِرّي : ما فيش فايدة , ف المتسوّلين ,.. المتسوّلين , بيخبّطوا ع البيوت , عشان يلمّوا نقوط , فعلا يا قاعدين , يكفيكو شر الجايين , ..طبعا فتحت له الباب , وأول ما فتحت الباب , لقيته صرخ صرخة , جامدة ما تصرخهاش فرخة , بلدي مسكها صحابها , ومن رقبتها راح ساحبها !
حنفي ( بفزع ) : يا أمّه..... انت مين ؟
الضيف ( بقوة ) : انا المسيح الدجال ؟
حنفي : طب استنى اخش اجيب لك الزبالة
الضيف ( بإنزعاج ) : يا حمار انا الدجّال مش الزبّال
حنفي :ياعم انت كدّاب.... المسيح الدجال مش هيظهر دلوقتي هيظهر في آخر الزمن
الضيف : ما دة آخر زمن اللي احنا فيه
حنفي : انت جي تسمّعني غنوة ايهاب توفيق ؟!! ..قال على آخر الزمن هيجي واحد دجّال يعمل لي فيها المسيح الدجال
الصيف : طب تصدّق ازاي ان انا المسيح الدجّال ؟!
حنفي : فيه علامات وإمارات وإشارات موجودة ف المسيح الدجال
الضيف ( يضحك ) : وكل العلامات دي موجودة فيا
حنفي : إزاي ؟!!
الضيف : أنا بقالي عصور متقيّد بالسلاسل
حنفي : طب ومين بيجيب لك الأكل وانت متقيّد ؟!!
الضيف : أيه ؟!!
حنفي : مين اللى ربطك أساسا بالسلاسل ؟ وانت عملت ايه عشان تتربط طول السنين اللي فاتت دي ...إلعب غيرها
الضيف : انت مش ملاحظ ان انا أعور ؟!!
حنفي : مش انت لوحدك اللى أعور
الضيف : أنا الكذاب الأعور
حنفي : ياعم الناس العورة كتير ...والكذابين والحمد لله أكتر !
الدجّال : انا أغلب أتباعي نساء , النساء دايما ورايا
حنفي ليه ؟ انت فاكر نفسك كاظم الساهر؟!!.. ياعم انت اعور وكذّاب مش حلو وكدّاب
الدجّال : المفروض انت ما تستعرضش عضلاتك عليّا وتخاف مِنّي , إنت المفروض تترعب دلوقت
حنفي : ياعم هوّا تخويف وخلاص ..إقنعني بيك وانا أخاف من عنيا حاضر
الدجّال : استهزائك بيا ف حد ذاته يعتبر قضية " إزدراء أديان "
حنفي : لا كدة انا بدأت اخاف تصدّق؟...المفروض اللى بيدسّوا رواياتك في الاحاديث النبويّة هُمّا اللى يتعمل لهم قضية " إزدراء أديان " ...إنت مش رمز ديني ياعم إنت مجرد روايات فيه مذاهب أخدت بيها ومذاهب تانية ما اخدتش بيها , وفيه اساتذة وعلماء كبار أنكروا حقيقتك زي الإمام محمد عبده والامام محمد رشيد رضا
الدجّال : أنا مُمكن أعيد إلى الحياة أبوك وامك ...
حنفي : اهو انت وابوك وامك وكل اللي جابوك ..انا كدة اللى هاعمل لك قضية " سب علني "
الدجّال : انا مستغرب من بجاحتك دي إنت بجح اوي
الحديث بيقول " من سمع بالدجّال فينأى عنه " ..إنت لازم تستغيث بالله مني , وتستعيذ بالله في التشهد من فتنة المحيا وفتنة الممات وعذاب القبر وانا .
حنفي : يااااه ...كُل دة ؟!!
الدجّال : انت المفروض اول ما تشوفني تتفُل في وجهي
حنفي : إسفوكس عليك ...مبسوط إنت كدة؟!.., رغم ان احنا منهيين عن البصق في أوجه بعضنا البعض
الدجّال : حقّك تتصرّف كدة ...ماهو انت غفلت عن ذكري صدق الحديث النبوي الشريف القائل " لا يخرج الدجال حتى يسهو الناس عن ذكره "
حنفي : مش مهم أغفل عن ذكرك , الأهم إنّي لا أغفل عن ذكر الله
الدجّال : خد بالك ...انا سأدخُل كل البلاد
حنفي : ياااه معاك تأشيرة تدخل كل البلاد معقول ؟!!..خُدني معاك والنّبي
الضيف ( بحماس ) : سأدخل كل البلاد إلا مكة والمدينة
حنفي : ليه ياعم؟!!... شوف لك تأشيرة وهتدخل انشاء الله , أو تشوف لك كفيل سعودي ياخدك بعقد عمل ف السعودية تشتغل هناك وتحج ف مكة وتقعد ف المدينة.. ايه المشكلة ؟!!!
الضيف : فيه ملايكة في مكة والمدينة هيحاربوني
حنفي : يعني مكة والمدينة فيهم ملايكة , وجبل الطور اللي ربنا أقسم بيه في قرآنه ما فيهوش ؟!!
الضيف : أنا نبي ولا نبي بعدي
حنفي : اللهم صلي عليك يا نبي
الضيف : أنا ربكم
حنفي : ياعم استغفر ربنا ...ماتقولش كدة...اللى قال كدة فرعون ..قال ( أنا ربكم الأعلى )
الضيف : أنا مكتوب على جبيني كلمة كافر ...إنت مش شايفها ؟!!
حنفي : عادي ياعم روح اي مركز تجميل يزيلها لك بالليزر مافيهاش حاجة , اكم ناس اتكتب على اياديهم وكتافهم بالوشم زمان وشالوا الكتابة اللي على أجسامهم
الضيف : كلمة كافر يقرأها الأمي والمتعلّم
حنفي : يقرأها الأمي ؟!! دة تضاد يوضحّ ويقوّي المعنى مثلا والا ايه ؟
الضيف : أنا ناري جنة وجنتي نار
حنفي : هههههههه لا حول ولا قوة الا بالله دة انت متلخبط خالص , قول عشر مرات الغنوة دي
قدري اختارني أكون ليها .......وانا سلّمت وقلبي إختار
شوفت الجنة ف عنيها .....إزاي أسيبها وأعيش ف النار
كفاياكو لعب بالجنة والنار بقا زهّقتونا ف دنيتنا , وخوّفتونا من آخرتنا !
الضيف : انت حافظ أول عشر آيات من سورة الكهف ؟!
حنفي ( مبتسما ) : الحمد لله
الضيف ( بفزع ) : أيه ؟!!
حنفي : يعني كل فيلم الرعب اللى انت عاملهولي دة والآخر خايف من تلاوة عشر آيات من سورة الكهف ؟!! وإشمعنا سورة الكهف بالذات ؟!! , انا ممكن أقرا عليك آية الكرسي أحرقك
الضيف : انت شوفت حد شبهي قبل كدة ؟!!
حنفي : اه طبعا شوفت كتير ع النت وعلى قناة توب موفيز كمان , انت تنفع شخصية في أفلام رعب بالميكب اللي انت عاملُه دة
الضيف ( بحماس ) : أنا أأمر السماء تمطر فتمطر , وأأمر الأرض تنبت فتنبت
حنفي : ههههه غلط طبعا انزال الغيث دة من علم وفعل ربنا بس ربنا عز وجل بيقول (إِنَّ اللَّهَ عِندَهُ عِلْمُ السَّاعَةِ وَيُنَزِّلُ الْغَيْثَ) , المطر دة رحمة من ربنا مش منك انت ربنا سبحانه بيقول : ( وَهُوَ الَّذِي يُنَزِّلُ الْغَيْثَ مِن بَعْدِ مَا قَنَطُوا وَيَنشُرُ رَحْمَتَهُ) .., وبرضة ربنا هو اللي بيجعل الأرض تنبّت مش إنت , ربنا عز وجل بيقول (َهُوَ الَّذِيَ أَنزَلَ مِنَ السَّمَاءِ مَاءً فَأَخْرَجْنَا بِهِ نَبَاتَ كُلِّ شَيْءٍ فَأَخْرَجْنَا مِنْهُ خَضِراً نُّخْرِجُ مِنْهُ حَبّاً مُّتَرَاكِباً وَمِنَ النَّخْلِ مِن طَلْعِهَا قِنْوَانٌ دَانِيَةٌ وَجَنَّاتٍ مِّنْ أَعْنَابٍ وَالزَّيْتُونَ وَالرُّمَّانَ مُشْتَبِهاً وَغَيْرَ مُتَشَابِهٍ انظُرُواْ إِلِى ثَمَرِهِ إِذَا أَثْمَرَ وَيَنْعِهِ إِنَّ فِي ذَلِكُمْ لآيَاتٍ لِّقَوْمٍ يُؤْمِنُونَ )
الضيف ( بغضب) : انا احيي الناس و أميتهم وأبعثهم من جديد
حنفي : هههههه ياباشا إماتة الأحياء وإحياء وبعث الموتى بيكون لله فقط , الموت بيكون في الدنيا , لكن البعث بيكون في الآخرة , والاتنين من أوامر الله – عز وجل – اللى مالناش غيره ولي ولانصير حتى ربنا - عز وجل - بيقول : (إِنَّ اللّهَ لَهُ مُلْكُ السَّمَاوَاتِ وَالأَرْضِ يُحْيِي وَيُمِيتُ وَمَا لَكُم مِّن دُونِ اللّهِ مِن وَلِيٍّ وَلاَ نَصِيرٍ), والمسيح الحقيقي لما احيا الموتى احياهم بإذن الله ولم يملك إماتة الناس لأن المحيي المميت هو الله فقط , الصفتين دول لله فقط , وبعدين اطمّن النمرود قال كدة قبلك وما اتوفّقش , ...صحيح انت جي منين ؟!!....من مستشفى المجانين ؟!!
الضيف : لأ من دير في جزيرة مرو في خراسان
حنفي : وبتقولها بثقة اوي كدة ليه؟ دة اهل السنة والجماعة أصلا اختلفوا على مكانك
الضيف ( بحزن ) : انا باقول لك الرأي الراجح
حنفي : الرأي الراجح عند فلان غير الرأي الراجح عند ترتان خُد بالك
الضيف ( بحزن ) : للأسف ...مش بس اهل السنة والجماعة اختلفوا فيا ..القاديانية والشيعة والعلمانين اختلفوا فيا وف مكان خروجي هُمّا كمان ,...ناس تقول اني هاخرج من خراسان , وناس تقول اني هاخرج من طريق بين الشام والعراق
حنفي ( ساخرا ) : دة حتى د/ مصطفى محمود - الله يرحمه - اتكلم عنك كلام مختلف خالص في كتابه ( رحلتي من الشك إلى الإيمان ) .
الضيف ( بحزن ) : كثرت الروايات حولي ....وما استمع أحد إلى قولي
حنفي : انت موجود في الاسلام والمسيحية ؟!!
الضيف ( بحماس ) : أيوة ....
حنفي : طيب انت ديانتك ايه بقا ؟
الضيف : يهودي
حنفي : طب ازاي يهودي وخرجت من دير ؟ ,... المفروض طلاما انت يهودي تخرج من المعبد اليهودي ..
الضيف : شكلك ما تعرفش حديث " الجساسة "
حنفي : لأ ما اعرفهوش الصراحة ...وبعدين ايه اساسا سبب خروجك ؟!!.
الضيف : غضبة غضبتها
حنفي: طب ما تستهدى بالله كدة وتدخل تاني.. مش ناقصاك ياعم كفاية علينا أمريكا وروسيا واللي بيعملوه في العالم , وبعدين حد غضّبك.. احنا ذنبنا ايه عشان تخرج تخرب علينا ؟!!
الضيف ( بحماس ) : انا احد علامات الساعة الكبرى...انا معايا معجزات كثيرة بأفتن بيها الناس
حنفي: المعجزات ربنا بيجعلها للأنبياء عشان الناس يآمنوا , مش بيجعلها للكدابين عشان الناس يكفروا ! , ربنا بيدعو الى الايمان مش الى الكفر ربنا - عز وجل- بيقول ( وَاللّهُ يَدْعُوَ إِلَى الْجَنَّةِ وَالْمَغْفِرَةِ بِإِذْنِهِ وَيُبَيِّنُ آيَاتِهِ لِلنَّاسِ لَعَلَّهُمْ يَتَذَكَّرُونَ)
الضيف : ازاى الكلام دة ؟َ!!...
حنفي : مش معقول يعني هاكّذّب آيات الله وأصدّق روايات البشر ...مش سعادتك بشر برضة ؟
الضيف : أنا بشر ولكن من طبيعة خاصة ...انا مثلا باظهر في كل مكان
حنفي : ليه انت فاكر نفسك سيلين ديون؟! ..فنان عالمي سعادتك وعندك حفلات وجمهور في كل مكان ؟!!...انت لو ظهرت دلوقتي اساسا الأسلحة الفتاكة هتدمّرك انت فاكر نفسك ايه ؟!!
الضيف ( بحماس ) : انا قوي جدا
حنفي : انت قوى من الروايات الكتيرة اللى عملت منك بطل ...انت قوي لأنك شخصية أسطورية مخيفة للناس البسطاء... زيك زي ام اربعة واربعين وأبو رجل مسلوخة
الضيف : انت بتشكك في وجودي ؟!!
حنفي : مش انا بس اللى باشكك في وجودك ...سبقني للتشكيك فيك شخصيات عظيمة زي الامام محمد عبده – الله يرحمه - و والامام محمد رشيد رضا إنت لحقت تنسى ؟!! .
الضيف ( بحزن ) : أنا ماليش أولاد
حنفي : ياعم روح أي مركز متخصص في علاج أمراض الخصوبة والعقم وربنا هيكرمك وهتتعالج وهتتجوّز وهتخلّف بإذن الله
الضيف : إنت المفروض تستعيذ مني في كل وقت وفي كل صلاة لأن أنا فتنة
حنفي : ليه انت فاكر نفسك هيفاء وهبي ؟ , انت اعور ومخرّف وشكلك وحش , الفتنة دي بتحصل اما الواحد بيتفتن بحد جميل
الضيف ( بحماس ) : أنا راكب حمار لا يعصيني ابدا بين أذنيه 40 ذراعا , ويمشي بسرعة جدا .
حنفي : دة كدة يبقى طيارة مش حمار يا حمار
الضيف : قل لي ....هل في بحيرة طبرية ماء ؟
حنفي : بصراحة ما اعرفش بحيرة طبرية ..أنا اعرف مادلين طبر دي لها علاقة بـ دي ؟!!
الضيف : انت ماتعرفش ان أنا سريع جدا في المشي ؟!!
حنفي : أكيد انت رياضي وصحتك حلوة عشان كدة بتمشي بسرعة
الضيف : انا معى نهرين ...نهر به ماء ابيض بارد ونهر آخر به نار حمراء متوهّجة
حنفي ( بإنزعاج ) : اه قول كدة بقا انت جي لي تبيع انهار وبتاع ...مندوب مبيعات انهار انت.... شكرا مش هاشتري نهر كفاية عندنا نهر النيل الحمد لله بس يارب ما يروحش مننا
الضيف ( بقلق ) : احم
حنفي : ما يروحش مننا بتلويثنا له يعني مش قصدي سد أثيوبيا إنت فاهم , ولو احتجنا لنهر أكيد هنقول لك يعني ابقى سيب لنا رقم تليفونك او رقم تليفون حد من حبايبك أو من قرايبك
الضيف ( بحماس ) : ألا تعلم أن أتباعي هم اليهود والمنافقين وهم عبادي
حنفي : مافهمتش من الجملة دي الا كلمة عبادي ...انت تقصد الفنان عبّادي الجوهر ؟
الضيف ( بإنزعاج ) : انا قلت عبادي مش عبّادي
حنفي : الأتباع شيء والعباد شيء تاني , ومش معنى اني تابع ليك اني عبد ليك
الضيف : انا منفرج الساقين
حنفي : معلش عندك تسلخات كلنا بتجي لنا تسلخات في الصيف
الضيف : هل تعلم أن أشد الناس عليا هم اولاد بني تميم ؟
حنفي : انا عرفت في الروايات ان القبيلة دي كانت احب القبائل الى الرسول والله اعلم , بس فين القبيلة دي دلوقتي ؟ , وهل لازالوا اقوياء زي الاول والا خلاص ؟ , وإشمعنا اهل القبيلة دي بالذات ؟!! الرجّالة كتير
الضيف ( بحماس ) : هل تعرف احد من قبيلة بني تميم ؟!!
حنفي : أنا الصراحة ما اعرفش غير سوزان تميم الله يرحمها... ماتت ودمها راح هدر , واللي قتلها طلع .......
الضيف : اخشى من اليوم الذي يلقاني فيه عيسى ويقتلني
حنفي : لا اطمن عيسى مات أصلا وربنا رفعه إليه , ربنا عز وجل قال في كتابه العزيز (إِذْ قَالَ اللّهُ يَا عِيسَى إِنِّي مُتَوَفِّيكَ وَرَافِعُكَ إِلَيَّ) سيدنا عيسى توفّاه الله .
الضيف : انا ساحر
حنفي : طيب شوف لك سيرك تشتغل فيه انا ما اسميش حنفي الحلو
الضيف ( بإنزعاج ) : يبدو أنك جاهل بالأحاديث النبوية الشريفة التى رويت عنّي
حنفي : الأحاديث اللى سمعتها عنك كتيرة جدا جدا وكل مذهب عامل عنك احاديث وروايات وافلام هندي , وكل الاحاديث متضاربة مع بعضها ومحدش اتفق فيك على حاجة , دة انت حتى الناس مش عارفين انت اسمك " المسيح " والا " المسيخ " الدجال , انت خرافة اصلا مالكش وجود , والقرآن ما اتكلّمش عنك خااالص
الضيف : أنت منكر لصحيح السنة ...انت كافر !
حنفي : وانت دجّال فعلا زي ما قولت لي !
الضيف ( بإنفعال ) : إخرس !
حنفي : انت جي تخوّفني عشان تاخُد لك قرشين زيك زي الشيوخ اياهم بتوع ترهيب الناس بإسم الدين , بيخوّفوا الناس عشان يستنزفوهم ماليا وفكريا وعقائديا
الضيف ( بحماس ) : يا كافر
حنفي ( بإنزعاج ) : امشي يا دجال يا ابن ال ...........
قال حنفي بن تامر : وقطمت الكلام , ودخلت قوام قوام , وقفلت الباب على طول , ووقفت ف بيتي أقول , : كفايانا بقا حوارات , فكسانة وخرافات , احنا ف عصر العلم , والبشر بالعلم , عرفوا المجرّات , الكونية وحركات , الشمس والنجوم , والرياح والغيوم , والأقمار والمواكب , الفلكية والكواكب , والزُهرة والمشترى , إحنا رجعنا لورا , علشان سيبنا العلماء , زي الخوارزمي و زي , ابن سينا و زي , ابن الهيثم والرازي , وقعدنا عشان نرازي , في بعض بالفقهاء , وأقوال الشيخ فلان , والإمام علّان , وفتاويهم ف الدين , وبقينا مُتعصّبين , ليهم وعاملين هالومّا , عنهم رغم ان هُما , بشر ..يُخطأ ويُصيب , بيختلفوا مع بعض , ويؤخذ منهم ويُرد , شيء عادي مش عجيب ! , ..ضيّعنا جُهدنا , وشغلنا نفسنا , بتفاسير وآراء , بشرية دسّناها , ف كُتُبنا وقدّسناها , وع القرآن قدّمناها , وقتلنا بيها بني آدم , وقولنا عليها للعالم , دي شريعتنا الغرّاء ! , ودي سُنّة الرحمان , بقا تُراثنا مليان , بالخرافات المكذوبة , والروايات المنسوبة , لسيدنا الرسول , وسيدنا الرسول , بريء من الحاجات ديّا , وم الخرافات البشريّة ,...كنا أمّة واحدة , مع بعضها مُتّحِدَة , وبسبب الروايات , المفتنة والوشايات , إتقسّمنا لحركات , ومذاهب وجماعات , بتقتل بعضها , وتكفّر بعضها , ودخلنا في متاهات , دة مؤمن ودة سافر , ودة مسلم ودة كافر , وبقينا نحاسب بعض , على نوايا بعض , رغم اننا عارفين , كويس وفاهمين , ان ف يوم الدين , هيبقى الحكم لله , على نوايا البشر , ومصاير البشر , بعد فتح القبور , وتحصيل اللي ف الصدور , سبحانه في علاه , العلى العظيم , قال فكتابه الكريم : (إِنَّ الَّذِينَ آمَنُوا وَالَّذِينَ هَادُوا وَالصَّابِئِينَ وَالنَّصَارَى وَالْمَجُوسَ وَالَّذِينَ أَشْرَكُوا إِنَّ اللَّهَ يَفْصِلُ بَيْنَهُمْ يَوْمَ الْقِيَامَةِ إِنَّ اللَّهَ عَلَى كُلِّ شَيْءٍ شَهِيدٌ) ...والختام
اسعدني تعليق حضرتك واسف لإرهاق حضرتك في القراءة
المسيح الدجال لم يتم إغتراعه بل هو إعتقاد مترسخ موجود قبل الإسلام في أديان كثيرة، فقط تم إدراجه في المعتقدات الإسلامية فيما يعرف ب "Syncretism". و هو جزء من المعتقد الثنوي.
و عندي نفس المشكلة في صعوبة فهم اللهجة المكتوب بها النص.
كنت احسب ان اللهجة العامية المصرية معروفة بين العرب بسبب شهرة وكثرة افلامنا القديمة ومسلسلاتنا المصرية
لم أقصد من هذه المقامة جرح عقيدة أهل السنة والجماعة بشأن المسيخ الدجال , فالشخص الذي يظهر في المقامة هو شخص يقلد المسيخ الدجال , ويدعي أنه هو المسيخ الدجال من باب تخويف الناس للإحتيال عليهم , أما حنفي بن تامر فهو كما نعلم شخص أحمق مكروه مادي التفكير لا يدري شيئا عن المسيخ الدجال لا من قريب ولا من غريب كما هو واضح في المقامة .
شكرا لكم ...واطمع في سعة صدروكم
دعوة للتبرع
الوهّاب / وهب / يهب: نريد لمحة عن إسم ( الوهّ اب ) فى القرآ ن ...
القسم بالطلاق: انا قلت لزوجت ى على الطلا ق ما هتساف ر؟ ما...
رؤية الله فى المنام : قرأت فى كتاب أحياء علوم الدين وكتب الصوف يه ...
القتل الخطأ: ما قولكم في سائق سيارة أجرة و قع له حادث مرور...
نعم يكفى : هل الأغس ال المخت لفة کغسل الح 40;ض ...
more
عندما بدات بقرائة مقالتك ووجدتها باللهجة المصرية العامية وجدت صعوبة في بدايتها وكنت اريد عدم اكمال المقالة لكن مادة الموضوع وهو المسيح الدجال الكذبة الكبرى التي تم اختراعها وصدقها الكثير من المسلمين وغير المسلمين وجدت اسوبك الساخر اسلوب جميل ومناسب لهذا الدجال الكبير هذا الاسلوب القصصي الساخر مناسب جدا انا شخصيا اعجبني هذا الاسلوب موفق اخي ماجد