بالمصري حقيقة وعد بلفور

سامح عسكر في الجمعة 21 مارس 2014


درسنا واحنا صغيرين ان وعد بلفور كان هو السبب في وجود دولة إسرائيل، وأصل بلفور وزير الخارجية عمل وعمل وعمل، واصل الصهاينة عملوا وعملوا، مفيش مرة نقول عملنا وعملنا..!

والصراحة موضوع بلفور دا مش داخل دماغي..!

مش بانفيه انه حقيقة تاريخية، ولكن بانفي مسئوليته المباشرة عن وجود دولة إسرائيل، ولو عاوزين نفكر صح يبقى تعالوا نحسبها بالورقة والقلم:

1-وعد بلفور كان سنة 1917..بينما أول مستوطنة في إسرائيل تم بنائها سنة 1870 وكان اسمها مستوطنة.."مكفا إسرائيل"..

2-ودا معناه إن الاستيطان اليهودي بدأ قبل وعد بلفور ب47 سنة، طب كان مين اللي ماسك فلسطين أيامها؟

3-فلسطين كانت تحت سيطرة الخلافة العثمانية..اللي الإخوان والسلفيين بيقولوا أشعار فيها لحد دلوقتي .!...ودا معناه إن الخلافة العثمانية مسئولة عن الاستيطان اليهودي في فلسطين.

ولكن الكلام دا مابيتقالش..انما اللي بيتقال..أصل بلفور وأصل بريطانيا، وبلفور قال ، والغرب المتآمر، وحكماء صهيون.. ......إلخ...!

4-كان لحد سنة 1876 ماكانش موجود غير خمس مستوطنات بالكتير، وعدد اليهود ماكانش يكمل ..(ألفين تلاتة بالكتير)، لكن من سنة 1876 لحد سنة 1909 وصل عدد المستوطنات ل40 مستوطنة ، وعدد اليهود زاد عن ..(12 ألف يهودي).

5-أنا بقول التاريخ اللي فوق دا ليه؟...لأن السلطان عبدالحميد آخر سلاطين العثمانيين مسك في الفترة اللي انتشرت فيها مستعمرات اليهود من سنة 1876 إلى سنة 1909 ودا التاريخ الرسمي لانتهاء الخلافة العثمانية وانتقال السلطة لأحزاب تانية لحد ما كمال أتاتورك قضى عليها تماماً سنة 1924..

6-ودا معناه إن مش وعد بلفور هو اللي أعطى فلسطين لليهود، ولكن الخلافة العثمانية- اللي الإخوان طالعين بها السما- هي اللي سمحت بإنشاء المستعمرات اليهودية، وكله كان بالرشوة اللي كانت سمة مميزة في فترة حكم السلطان عبدالحميد..!

عرفتوا ليه موضوع وعد بلفور كان أكبر مقلب شربناه في قضية فلسطين؟

لأنه هو الحيطة المايلة اللي بتخدم نظرية المؤامرة، وإنه كان سبب في تبرئة العثمانيين من الخيانة في فلسطين..

هاتقولي طب مال العثمانيين ومال العرب..هاقولك ان اللي كان ماسك التعليم من منتصف القرن العشرين لحد دلوقتي كانوا ناس شايفين الدولة العثمانية بصورة انها .."الخلافة الإسلامية الراشدة"..وطبعاً لا يمكن الطعن فيها ولا في تاريخها..

دا يكفي إنهم شربونا مقلب تاني وقالوا إن الغزو التركي لمصر سنة 1517 كان.."فتح إسلامي على نهج الرسول والسلف الصالح"..

بس ياسيدي آدي قصة .."مقلب"..بلفور..!

اجمالي القراءات 9783

للمزيد يمكنك قراءة : اساسيات اهل القران
أضف تعليق
لا بد من تسجيل الدخول اولا قبل التعليق
تاريخ الانضمام : 2012-09-25
مقالات منشورة : 788
اجمالي القراءات : 4,913,224
تعليقات له : 102
تعليقات عليه : 411
بلد الميلاد : Egypt
بلد الاقامة : Egypt