الصحابة والزحلانين (الزعلانين ) .

عثمان محمد علي في السبت ٢٥ - يوليو - ٢٠١٥ ١٢:٠٠ صباحاً

معذرة  احيانا لازم نبحث عن  طريقة سهلة وبسيطة لتوصيل المعلومة ((على طريقة الفنان أحمد زكى فى مسرحية العيال كبرت لما كان بيحاول يفهم اخوه سلطان (سعيد صالح ) خطورة  موقف العائلة  فى حالة هروب الأب .))طريقة تحاصر بها  القارىء او السامع  الذى يُجادل بالباطل فى الحق ، ولا يتركك وشأنك ،ولكن يُلاحقك ويُطاردك ،بل وتصل مُلاحقته لدرجة السباب  والتكفير ،والإخراج من الإسلام . لتكون آخر حُجة لك عليه أمام الله ، وتتركه إلى يوم الفصل .

وهذه الفكرة أو المقالة  من هذه النوعية البسيطة كتبتها  للفيس بوك ردا على بعض أصدقاء صفحاته   الذين هاجمونى بضراوة  بعدما كتبت عن بعض الرواة و أفعال الصحابة ،وعن الزهراء والحُسين .

 

الصحابة والزحلانين (الزعلانين ) .
معلش حنكتب كلمتين بالعامية المصرية فإستحملونا فيهم ..
بعض الناس كل ما نيجى نكتب عن اقوال او افعال وأحوال الصحابة السلبية والسيئة بالرغم ان إحنا جايبنها من كتب جدودهم واسلافهم ، تلاقيه يتنفض ويقوم خبط دماغه فى الحيط ،ويبدأ يتنطط ويلف ويدور فى الأوضة وكأن قرصته عقربة ، ويقول لك لا ، الصحابة لا . كله إلا الصحابة ..
فى إيه يا إخونا ، هم الصحابة دول مش بشر ، ولا نازلين من السما ؟؟ .
يا جماعة الخير الصحابة دول بشرعاديين خالص خالص . اتولدوا بعد حمل 9 شهور زى كل الناس ، ومرو بمراحل الطفولة التعيسة ،او السعيدة زى كل الناس ، ولعبوا فى الطين والرمل ،وجالهم حمى وكحة وإسهال ومغص زى كل الأطفال ، ومروا بمراحل المراهقة والشباب ومشاكلها وتهورها ،ومروا بمراحل النضج ،وبالضعف و الشيخوخة والكهولة ،ومنهم اللى مات قبل كده ... يعنى مروا زى كل الناس بكل المراحل البشرية من ضعف ،وقوة وضعف ،وعجز وكهولة وموت . وكان الشيطان موجود معهم فى كل مراحل حياتهم. احيانا يتغلب عليهم ،واحيانا ينتصروا هم عليه .
والصحابة زى ما وصفهم القرآن ،كان منهم المؤمنين ،والمتقين والصادقين ،وهؤلاء لا يعلمهم أحد ،وغالبا ممن ماتوا قبل وفاة النبى عليه السلام . وكان منهم المنافقين ، ونزلت فى مواصفاتهم وسلوكياتهم سورة (المنافقون ) والعديد والعديد من آيات الذكر الحكيم . ومنهم من كانوا يؤذون الرسول وأزواجه ، ومنهم من بنوا مسجد الضرار ليشعلوا الفتنةوالفرقة بين النبى وبعض من المسلمين ، ومنهم من كانوا هم أصحاب كذبة وفرية حادثة الإفك ، ومنهم من إنقلب على عقبيه بعد موت النبى .
-طيب الصحابة دول مش هم اللى قتلوا بعض وسفكوا دماء بعض بالألاف بعد موت الرسول ؟؟؟
طيب مش الصحابة دول هم اللى إعتدوا اهل البلاد المجاورة ،وقتلوا رجالها ، وجرجروا نساءها ،وقسموهاعلى بعض ،وناموا معهم سفاحا وحراما بحجة انهم سبايا وجوارى ، وخالفوا فى ذلك أمر القرآن وتعاليمه فى أصول الزواج ؟؟؟
-مش الصحابة دول هم اللى نهبوا ثروات البلاد المعتدى عليها دى بحجة دفع الجزية ،والخراج بدل الإسلام ،وخدوه ووزعوه على بعض ، وراحوا يتمتعوا به ، ويحولوه لذهب ،واشتروا بالباقى ارض زراعية فى مصر والشام والعراق وخراسان ؟؟
مش الصحابة دول هم اول ناس عملوا تمييزعنصرى وتفريق بين الناس ،وقسموا الناس لطبقتين . طبقة الأحرار (اهل مكة والمدينة والحجاز ) ،وطبقة اوطى وهم الموالى (اهل البلاد المفتوحة ) . بالذمة فى اقذر من كده ، يعتدوا على الناس ، يقتلوا الرجال ،ويجرجروا الحريم جوارى ،ويسرقوا الأموال والثروات ،والباقى يسموهم موالى .. طيب ده فى أى دين ؟؟؟ وكانوا بيطبقوا أى آية فى كتاب الله بإعتدائهم على الناس وتدمير بلادهم ونهبها ؟؟؟
مش الصحابة دول اللى كان منهم خالد بن الوليد لما اقسم على ان يملأ نهرالفرات بدماء العراقيين . وجاء رجل طيب ينقذ البشر من توحشه وقال له ده مستحيل ، وعلشان متوقعش يمينك .إقتل شوية وإفتح المياه على دمهم فى النهر فتلونت مياهه باللون الأحمر وكأنه قتلهم كلهم . ولا الولية اللى طلقها من جوزها ،وقتله ،ودخل عليها فى نفس اللحظة ؟؟
-هو إبن عباس كان من الصحابة ولا لا ، لما سرق خزانة الفلوس من الكوفة لما كان والى عليها وطفش وراح بها مكة ،ولما على بن ابى طالب ارسل له ان يردها ،قال له ، بطل تخريف يا على ، ولو ما سكتش حابعت الفلوس لمعاوية يجهز بها جيش يحاربك بها ويخلص عليك ؟؟؟
نقول إيه ولا إيه ؟؟
طبعا واحد فلحوص من اللى بيقرصهم الحنش لما بنقول إن الصحابة كانوا بشر فيهم اللى نجح ،وفيهم اللى سقط ، وإحنا لا نقدس أحد إلا الله الواحد الأحد ،حيصرخ ويقول يعنى مدرسة النبى ،كانت فاشلة ؟؟؟؟
اقول له لا .. النبى لم يكن يعلم الغيب ولا يعرف إيه اللى حيحصل بعد مماته ،ولا كان يعرف من الكويس منهم ولا من اللى حيبقى زى الزفت .ثم إنه عليه الصلاة والسلام ليس مسئولا عن أحد ولا حتى عن ازواجه . النبى عليه الصلاة السلام كان مسئولا فقط عن تبليغ الرسالة .وكان حريصاعلى ان يلتزموا بها ويطبقوها. لكن علم السرائر فهذا عند رب العالمين
. بدليل ان القرآن نزل على النبى فى سورة الأحزاب ويقول له عن ازواجه ما معناه .اللى حتغلط منهن (سواء فى حياته أو بعد مماته ) حيكون حسابها وعقابها فى الدنيا ُمضاعف ، واللى حتبقى صالحة وتعمل خير اجرها وجزاءها حيكون كمان مُضاعف .( يَا نِسَاءَ النَّبِيِّ مَن يَأْتِ مِنكُنَّ بِفَاحِشَةٍ مُّبَيِّنَةٍ يُضَاعَفْ لَهَا الْعَذَابُ ضِعْفَيْنِ ۚ وَكَانَ ذَٰلِكَ عَلَى اللَّهِ يَسِيرًا. وَمَن يَقْنُتْ مِنكُنَّ لِلَّهِ وَرَسُولِهِ وَتَعْمَلْ صَالِحًا نُّؤْتِهَا أَجْرَهَا مَرَّتَيْنِ وَأَعْتَدْنَا لَهَا رِزْقًا كَرِيمًا)..
فالرسول عليه السلام ليس مسئولا عن اخطاء من كانوا فى عهده ولا عمن جاءوا بعده من المسلمين المنافقين ، ولا عن اخطاء وخطايا صحابته الذين تخلواعن تعاليم الرسالة التى نزلت عليه وهى القرآن الكريم . وليس مسئولا عن فشل المسلمين حينما قتل بعضهم بعضا من اجل الخلافة والامارة والملك ،ولا عمن من قتلوا غيرهم وجرجرجروا نساءهم وباعوهم إماءا وجوارى واولادهم عبيدا . فالرسول عليه السلام ،والرسالة التى بُعث بها من سيئاتهم وخطاياهم براء .
- المهم أن الصحابة مجرد بشرعاديين كان فيهم كل مزايا البشر ، وكل عيوبهم ايضا كان فيهم من كان شديد الإيمان (ولا يعلمهم إلا الله ) ، وفيهم من كان زعيما للمنافقين ، وكان فيهم من هو استاذ للشياطين .
- كل هذا من كُتب السابقين عنهم . واللى مش عاجبه يروح يحذف اللى كتبه عنهم اسياده واسلافه ،وبعدين يجى يحاسبنا .
- إحنا بس كل اللى عملناه إن إحنا قارنا اعمال بعضهم السودة وعرضناها على اوامر ونواهى كتاب رب العالمين القرآن العظيم .فيا ريت تكون الرسالة واوامرها (القرآن ) هى الاهم وهى الاعلى ،وإن الصحابة وغيرهم زى كل البشر .تدرسوا حياتهم بهدوء وبموضوعية ، وتقولوا على الصح اللى فيها صح ،والغلط اللى عملوه مخالف للقرآن أنه غلط وخطيئة وخطية .

- . ماشى يا قطاقيط .

اجمالي القراءات 12810